Ulsi Manja, ministër i Drejtësisë, i cili drejton edhe strukturën anti-korrupsion, paralajmëroi sot se javën e ardhshme do të publikojë rastet e denoncimeve të qytetarëve për Kadastrat dhe Legalizimet. Ndërsa paraqiti sot rastin e dy inspektorëve të AKU Fier, që sipas tij, kishin kërkuar rryshfet ndaj një qytetari.
Manja u shpreh se denoncimi është bërë nga vetë qytetari që ka rënë pre e abuzimit në datat 14 dhe 15 shtator të këtij viti, për të cilat ka edhe pamje filmike.
“Rasti i sotëm lidhet me një qytetar që nuk ka pranuar të japë ryshfet. Për ata që dalin dhe thonë “nesër hajde andej vlla, kalo sille atë plaçkën”. Na takon ta provojmë që qytetarët nuk duhet të kenë frikë të denoncojmë. Mos heshtni. Fjalët e thëna dhe ankesat e bëra janë legjitime nga pikëpamja humane pasi ke paguar ryshfetin por nuk janë të denja. Nëse zgjatet zinxhiri i heshtjes,, zgjatet edhe litar.
Qytetari është vendosur në presion nga disa inspektorë të AKU në Fier. Ata e kanë gjobitur me vulën e shtetit. Ne menjëherë jemi vënë në lëvizje. Gjobëvënësit me maskën e shtetit që nuk përfaqësojnë shtetin do përballen me drejtësinë dhe nuk do ta kenë të lehtë. Do vendosim në kallëzim edhe drejtuesit e tyre si person në dijeni. Drejtuesit jo gjithmonë janë pjesë e gjobave por ata duhet ta dinë veprimtarinë e inspektorëve në terren. Mua nuk më rezulton në rastin konkret që të ketë praktikë të vendosjes së gjobave që u vjen njerëzve”, tha Manja.
Në vijim, Manja u shpreh se në takimin e radhës, pas 1 jave, do të publikohen denoncimet për hipotekën dhe legalizimet.
“Raste abuzive që do kenë të njëjtin fat si ky i sotmi, deri në ndëshkimin e shushunjave që struken në zyrat e shtetit që janë aty jo për t’i shërbyer qytetarit por për xhepat e tyre. Detyra jonë është t’i çojmë deri në fund këto raste. Ka kohë për dy tre pyetje pasi në orën 01:30 do jem në komisionin e Ligjeve”, tha Manja.
