13 gola u shënuan në javën e tetë të Abissnet Superiores. Partizani ishte e vetmja skuadër udhëtuese që siguroi tre pikët, që ishin të parat sezonale për djemtë e Ilir Dajës.
Tirana vazhdon të kryesojë kampionatin me 20 pikë, duke e dërguar në 6 diferencën me Kukësin ndjekës. Rikthehemi te golat, teksa janë përzgjedhur tre më të bukurit e javës së fundit.
Emiliano Musta (Partizani), Mentor Mazrekaj (Laçi), Besar Iseni (Egnatia) dhe Randy Dwumfour (Skënderbeu). Anësori i majtë gjeti golin e parë sezonal me Partizanin në kampionat.
“Demat” fituan 0-2 përballë Kastriotit dhe sfidën e zhbllokoi Musta në minutën e 37-të. Goditje dënimi për ekipin kryeqytetas, gjuajtje potente e Mustës dhe topi në rrjetë.
Nga goditja e dënimit realizoi edhe Mazrekaj në Laçi-Teuta. Bardhezinjtë fituan 2-0, lojtari dardan shënoi golin e parë të takimit në fundin e pjesës së parë.
Goditje dënimi nga krahu i majtë, topi nuk u devijua nga askush dhe zuri të papërgatitur portierin Qirko.
Gol shumë i bukur u realizua edhe në Rrogozhinë. Egnatia-Vllaznia përfundoi në barazim 1-1. Ekipi i Maganit kaloi në avantazh me anë të Besar Isenit në minutën e 15-të.
24-vjeçari nga Shkupi lëshoi një goditje fantastike me “sallaken”, që u ndal në rrjetën e portierit Zogovic. Skënderbeu mposhti 2-1 Kukësin, me të tre golat që u shënuan në fraksionin e dytë.
Takimi u zhbllokua në minutën e 55-të nga Randy Dwoumfour, i cili kërceu më lart se të gjithë dhe gjeti trekëndëshin e portës verilindore./Supersport
