Drejtues të Forumit Rinor të Partisë Demokratike deklaruan këtë të Premte, se vendimi i kryetarit të PD-së Lulzim Basha për riorganzimin e FRPD-së, është “nul”. Sipas tyre, Basha nuk ka kompetenca për të çelur zgjedhjet në FRPD dhe vendimi vjen si hakmarrje pasi shumica e anëtarësisë ka mbështetur “Foltoret” e ish-kryeministrit Sali Berisha.
Kryesia e FRPD u mblodh sot në selinë blu pas vendimit të Bashës. Pas mbledhjes, kreu i FRPD-së, Belind Këlliçi tha se vendimi është i pabazuar në kompetencat e statutit të PD e FRPD dhe përtej kompetencave të Bashës.
“FRPD është një organizatë partnere e PD, bazohemi në statutn e FRPD-së. Mandati im dhe një pjese dërrmuese ka skaduar, por jemi në detyrë, deri në zëvndësimin tonë dhe në dorëzimin e detyrës së të rinjve me zgjedhje anëtar një anëtar një votë. Sot morrëm një vendim unanim kundër vendimit të PD dhe jemi për të bërë të ditur që ka qenë një proces, për të cilin kemi menduar ta nisim një muaj para. Por duke qenë se PD ndodhet në një krizë që duhet të marrë fund përmes votës, nuk kemi vepruar. S’është momenti për të uzurpuar PD-në, apo për të krijuar përcarje brenda PD-së”, tha ai.
“Kur të piqen kushtet në PD për të pasur një proces real, kemi detyrë statutor të dorëzojmë detyrën te një trupe e re. Vendimet merren me votë”, shtoi ai.
Ndërsa sekretari i FRPD-së sqaroi se hapjen e procesin zgjedhor, sipas statutit të FRPD, e përcakton vetë kryetari i formunit dhe jo kryetari i PD-së.
Ai shtoi se lajmërimi i Bashës erdhi pasi rreth 70 përqind e kryesisë së forumit rinor kërkuan mbajtjen e një referendumi për vendimin e Bashës, që përjashtoi Berishën nga grupi parlamentar demokrat, si dhe mbështetjen e tyre për “Foltoren” e ish-kryeministrit.
Më tej, bëri apel që të ndalohen shantazhet ndaj tyre.
