Sociologu Ergys Mërtiri, ka qenë i ftuar në emisionin “Të Paekspozuarit” në MCN TV, ku ka komentuar lëvizjen e Sali Berishës në bazën e PD-së.
Mërtiri e quajti këtë një lëvizje ku shkojnë kryesisht militantë dhe nostalgjikë.
Më tej, ai tha se fajtor për humbjet e njëpasnjëshme të zgjedhjeve nga PD, është edhe Sali Berisha, si një person që ka qenë drejtues jo formal i partisë, ndaj faji nuk i duhet vendosur vetëm, Lulzim Bashës.
Ergys Mërtiri: Nuk janë shumica e njerëzve që shkojnë tek zoti Berisha, por shumica e njerëzve janë asnjëanës. Ata që shkojnë te Berisha, janë militantë, nostalgjikë, kanë kaluar histori të përbashkët, në vetëdijen politike të tyre, konsiderohet Berisha si diçka identitare.
Pjesa tjetër janë që kanë urrejtje apo inat ndaj zotit Basha. Në gjykimin tim, nuk kanë frymë të madhe, nuk më duket e tillë.
Do të ishte mrekulli nëse në PD do të dilte një alternativë e tretë. Mund të prodhojë efekt entuziasmi që të sjelle përmbysjen e Ramës. Edhe në vitin 2013, nuk u krijua një parti e re në frymë. Të gjithë mbetën aty në parti, me shpresën se do të merrnin llokmat në PD. Vetë zoti Berisha, nuk dha dorëheqjen, por vetëm dorëheqjen formale, ka qëndruar në pozita bashkë-ortakërie. Kjo e bën edhe Berishën bashkëfajtor për humbjet. Themi që humbjen e ka vetëm kryetari formal dhe jo tjetri. Kjo është e pamoralshme.
Ylli Rakipi: Sali Berisha e ka drejtuar vendin për 15 vjet. Ndërsa njeriu tjetër mund të rrijë përjetësisht atje…
Ergys Mërtiri: E njëjta gjë vlen për Berishën, ka 30 vjet atje dhe kërkon ta ketë partinë të vetën pa qenë bashkëkryetar.
