Nga Skerdjan Dhuli
Të kam thënë shpesh që nuk duhet të ikin nga Shqipëria ? Ja kam futur kot. Kam qenë i luajtur nga mendja.
Ndaj ti i ri që më lexon, grahi këmbët, IK.
E ke parë sa ka shkuar çmimi i qerave këto kohë ? 400 deri në 600 euro. Ky është çmim kriminal, terrorist, genocidist a si të duash quaje, ndaj ik. Grah këmbët, ik, se s’ka kush të del për Zot.
E di pse ndodh kjo ? Po t’a shpjegoj para se të ikësh.
Krimi i organizuar dhe korrupsioni ndërtojnë pallate në Tiranë. Ata janë pronarët e apartamenteve sepse i ndërtojnë vetë ose i blejnë që në ndërtim dhe për të bërë pastrim parash, ata i rrisin çmimet sipas dëshirës së tyre.
Shtet rrumpalla që ke ti e unë është NJË me krimin e organizuar dhe jo vetëm që nuk e ndalon këtë marrëzi po as nuk e takson.
Ja del dot këtij çmimi ? Jo o ditëzi. Se ti me rrogën që ke, nuk paguan dot as qeranë. Ndaj ik. Ik e në paç mundësi, mos shkel më në këtë tokë.
Nuk e di se kush, por di që e kanë mallkuar, ndaj ik.
Ke gjetur punë po të kanë thënë që rrogën do e kesh 300 deri në 500 mijë lekë ?
Mos ik në atë punë, ik nga Shqipëria. Arratisu kudo, deri në Afrikë po deshe, vetëm këtej ik. Se kudo do shohësh ditë të bardhë, përveçse këtu.
Po çmimet e ke parë që rriten dita ditës ? Kush do i ndalojë, ata që përfitojnë prej tyre ? Jo o ditëzi, ndaj ik !
Ke gjetur punë po rrogën e ke nën 300 mijë lekë ? Ik natën. Pa zbardhur dita. Ik se për ty dita nuk do zbardhë kurrë e do vdesësh lypës.
Ke ndenjur deri tani me shpresën se do bëhej më mirë ? Ke qenë budalla, e ke dëgjuar edhe mua budallain tjetër që të kam thënë: “MOS IK!”. Në fakt duhet të kishe ikur tanimë.
Je shkolluar dhe ndihesh i fyer kur sheh se çfarë antivlere po promovohet ? Ik o lumëmadh. Ik me vrap. Këtu do jetë keq e më keq. Llumi do të drejtojë gjithçka dhe ti s’do gjesh kurrë hapsirë. Le që ekonomikisht nuk do ja dalësh dot, ndaj ik. Sa më shpejtë, vetëm ik.
Nuk krijon dot familje ? Normale, ndaj duhet të ikësh. Sa më parë, e sa më largë të mundesh. Vetëm ik. Kudo vetëm këtu mos rri.
Se këtu në qofsh i ndershëm e profesionist, ti nuk do blesh kurrë shtëpi. E pa shtëpi dhe ekonomi nuk do e nisësh dot kurrë familjen. Ndaj duhet të ikësh.
Ke inat me mua që të kam thënë prej vitesh: MOS IK ? Ke të drejtë të thuash ç’të duash. Më shaj e më degdis. S’ke faj.
Se unë kam gënjyer veten edhe ty kur të kam thënë: MOS IK!
Në më fale, mirë.
Po edhe nëse s’më fal, të paktën ik. Kështu edhe unë i çmenduri do jem në paqe me veten sepse nuk do kem mbi shpinë barrën e mbajtjes këtu dhe të marrjes në qafë të një të riu si ti.
