Kancelarja gjermane në largim, Angela Merkel mbështeti çmimin mbi karbonin si një mjet efikas për të luftuar ndryshimet klimatike, gjatë fjalimit të saj sot në samitin kyç të OKB-së për klimën.
“Bashkimi Evropian ka tashmë këtë lloj modeli çmimi për sektorin industrial. Të tjerët, për shembull Kina, po e prezantojnë këtë tani”, tha Merkel për politikën e ndjekur, që vendos një taksë mbi emetimet e dyoksidit të karbonit, në një përpjekje për të nxitur investimet në energjinë e pastër.
“Pasi dyoksidi i karbonit të ketë një çmim, investitorët e kapitalit privat mund të dinë, gjithashtu, se në cilin drejtim të investojnë teknologjikisht”, shpjegoi Merkel, duke shtuar se është e rëndësishme të përdoren jo vetëm paratë e taksapaguesve në luftën kundër ngrohjes globale, por edhe instrumente që kanë “kuptim ekonomik”.
Në përgjithësi, nevojitet një sasi e madhe investimi për të përmbushur objektivat globale të klimës.
Udhëheqësja gjermane iu referua një vlerësimi të ish-sekretarit të përgjithshëm të OKB-së, Ban Ki Moon, sipas të cilit zbutja e ndryshimeve klimatike globale do të kërkojë financim vjetor prej 800 miliardë dollarësh.
