Edhe pse starti nuk ka qenë aspak i mirë për Partizanin, atmosfera në kampin e kuq duket tepër pozitive. Kjo gjë u pa në seancën e djeshme stërvitore të “demave”, ku i pranishëm ishte dhe Olsi Rama, që ndoqi përgatitjet nga afër. Dy mungesa ranë në sy te stërvitja e djeshme. I pari ishte sulmuesi kryesor i skuadrës, Stenio Zhunior, i cili është vaksinuar dhe ka qëndruar dy ditë pushim, ndërsa i dyti, ishte Kristi Kote, i cili nuk është stërvitur me grupin. Ndërsa Ergys Kaçe u stërvit individualisht duke kryer vetëm disa vrapime rreth fushës.
NDRYSHIMET – Sfida kundër Egnatias, pritet të sjellë disa ndryshime në formacion te skuadra e Partizanit. Mungesat e Zhuniorit dhe të Kaçes janë të sigurta dhe zëvendësuesit e tyre janë Filipoviç në sulm dhe surpriza Maguete në mesfushë. 18-vjeçari është një lojtar për të cilin Daja ka shumë simpati dhe që ka një të majtë të hidhur. Maguete është gjithashtu edhe një driblues shumë i mirë dhe pritet të luajë titullar pas dy sulmuesve, Filipoviç e Cara. Ndryshime do të ketë edhe në mbrojtje, pasi qendërmbrojtësi i ri, Saliou Sembene, pritet të ulet në stol me Damçevskin që rikthehet sërish titullar në krah të Sotës dhe Belicës.
PARTIZANI ANGLEZ – Një detaj shumë interesant që binte në sy gjatë seancës së djeshme stërvitore ishte komunikimi mes lojtarëve gjatë situatave të ndryshme. Kur lojtarët po bënin një ndeshje kontrolli, u dëgjuan shumë shprehje në gjuhën angleze, si: “Shoot”, “pass back” etj. Ky komunikim duket i nevojshëm për shkak të lojtarëve të huaj. Gligorov, Damçevski, Saliou, Filipoviç e Maguete ishin lojtarët e huaj që u stërvitën ditën e djeshme me pjesën tjetër të ekipit. Gjuha angleze e përdorur shpejt, për një moment ngatërroi edhe shqiptarët, pasi Albion Marku dëgjohej teksa i thoshte Valentino Muratajt: “Shoot, shoot!” Kjo është një gjë që ndodh në të gjitha klubet nëpër botë dhe në shumicën e tyre flitet vetëm anglisht. Madje, edhe trajneri Ilir Daja pati një bisedë me Maguete në një moment, ku me shumë gjasa kanë komunikuar në gjuhën angleze.
PORTIERËT – Partizani aktualisht ka tre portierë në kontingjent. Kapiteni Alban Hoxha, Aldo Teqja dhe i riu, Laroshi. Gjatë ndeshjes së djeshme të kontrollit u inkuadruan Hoxha dhe Laroshi, me Teqjan që u stërvit në cep të fushës nga Ilir Bozhiqi. Megjithatë, pas disa minutash, ishte Teqja që u fut në njërën nga portat dhe Laroshi u largua për t’u stërvitur me Bozhiqin. Kujtojmë që Teqja prej disa vitesh tashmë është portieri numër 2 te Partizani, pas Alban Hoxhës, por me ardhjen e Laroshit duket se gjërat kanë ndryshuar. Madje, Laroshi është dhe portieri titullar i ekipit U-21. Megjithatë, në ndeshjet e Kupës së Shqipërisë përballë Tërbunit është aktivizuar Aldo Teqja, çka tregon se ai është ende portieri numër 2. Partizani përballet me Egnatian ditën e diel në “Air Albania”, me sfidën e vlefshme për javën e shtatë të Kategorisë Superiore që starton në orën 16:45.
/Panoramasport
