Alban Beqiri ka korrur një tjetër sukses në kampionatin Botëror të boksit që po zhvillohet në Beograd.
Mbërmjen e së premtes Beqiri ka eleminuar boksierin lizuanez Banis, në raundin e 1/32 të finaleve të kampionatit. Më parë boksieri shqiptar kishte mposhtur Manian nga Kenia në raundin e parë.
Me vendim unanim të gjyqtarëve, Beqiri ka fituar 5-0, ndërsa ka dominuar ndeshjen nga fillimi deri në fund.
29-28, 30-27, 30-27, 30-27, 30-27 ishin pikët e gjyqtarisë, gjithnjë në favor të boksierit Alban Beqiri, i cili vijon të jetë në formën e tij maksimale.
Tanimë në raundin e 1/16 të finaleve ai do të ketë përballë fituesin e çiftit Bekford (Panama) – Shiuan (Taipei), ndërsa kjo ndeshje do të jetë të dielën e 31 tetorit.
Sakaq përpara tij, tashmë në peshën 86-92 kilogram, është eleminuar Indrid Laçi, i cili është mundur nga anglezi Uilliams 5-0. 26-30, 27-30, 25-30, 26-30, 26-30 pikët e gjyqtarisë për anglezin Uilliams, kurse tanimë e gjithë vëmendja është tek Alban Beqiri.
