Kreu i PD-së Lulzim Basha ka mbledhur sot në një takim të gjithë krerët dhe përfaqësuesit e partive opozitare parlamentare ose jo për të unifikuar qëndrimin para zgjedhjeve të qershorit.
Basha tha se opozita bashkohet në një qëndrim për të mos lënë kriminelët të vendosin në këto zgjedhje por qytetarët.
“Sot kemi mbajtur një takim të opozitës parlamentare. Takim vjen pas një koordinimi të opozitës parlamentare dhe jo parlamentare. Kemi rastin të konfirmojmë qëndrimin tonë për zgjedhjet e ardhshme. Qëndrimi i unifikuar i opozitës, parlamentare është se në këto zgjedhje nuk mund të vendosin kriminelët por do të vendosin qytetarët. Nuk do të vendosin varfëria dhe korrupsioni qeveritar përmes shit-blerjes së votës por do të vendosin qytetarët. Zgjedhjet në rrezik për shkak të krimit dhe korrupsionit, për shkak të shndërrimit të Shqipërisë në një parajsë të krimit. Opozita ka paraqitur një platformë prej 17 majit. Sot kemi rënë dakord për një platformë, që është një kusht i patejkalueshëm për zgjedhje të lira dhe të ndershme. Në themel është kjo, zgjedhjet nuk do t’i vendosin kriminelët por shqiptarët. Votimi dhe numërimi elektronik, mospërdorimi i resurseve të shtetit në kundërshtim me ligjin etj”, deklaroi Basha.
Ai theksoi se opozita do të fokusohet vetëm tek zgjedhjet dhe çdo kauzë dhe veprimtari do të shkojë për to.
“E reja është që kohë më nuk ka. Çështje më të rëndësishme për shqiptarët nuk ka dhe nuk do të ketë. Opozita do të kushtëzojë çdo akt tjetër para reformës zgjedhore. Opozita parlamentare sot është dakordësuar që çështja numër një që kanë Shqipëria dhe shqiptarët janë zgjedhje të lira dhe të ndershme. Veprimtaria jonë, energjia do të fokusohet tek zgjedhjet”, tha ai.
Kreu i PD-së tha se shqiptarët duan zgjidhje të lira dhe të ndershme. “Thirrje gjithë shqiptarëve të bashkohen me këtë axhendë kombëtare që qeverisjen e ardhshme të mos ta diktojë krimi por vota e qytetarëve”, tha ai.
Basha është pyetur edhe për propozimin e LSI-së për listat e hapura dhe votimin elektronik. Ai deklaroi se PD nuk është kundër listave të hapura dhe se përshëndet qëndrimin e LSI-së për votimin elektronik.
“Përshëndes qëndrimin pro votimit elektronik, një nga zgjedhjet kundër shit-blerjes së votës. Përshëndes mbështetjen për votimin elektronik edhe nga faktorët qeverisës. Sa i përket sistemit zgjedhor, PD nuk është kundër listave të hapura. Kur kam folur për hapjen dhe fuqizimin e qytetarëve këta kam parasysh që kandidatët të mos caktohen nga kryetarët por nga qytetarët. Nuk jemi absolutisht kundër listave të hapura”, theksoi Basha.
