Zëvendëskryeministri Arben Ahmetaj, gjatë një aktiviteti në Tiranë për ceremoninë e 76-vjetorit të OKB, deklaroi këtë të Hënë se “Shqipëria e ka ulur varfërinë në raport me vendet e tjera me një shpejtësi shumë të madhe”. Konkluzioni, sipas ministrit, del në një raport të fundit të Bankës Botërore.
Numri i dy i qeverisë tha se qeveria ka mbështetur si “rrallëkush tjetër” të prekurit nga tërmeti.
“Imagjinoni ne nuk lamë askënd prapa pas ditës së vështirë të 26 Nëntorit të 2019-ës dhe si rrallëkush në ndonjë vend tjetër po i ofrojmë të gjitha familjeve ndihmë që nga grantet për të rikonstruktuar e ndërtuar e deri të shtëpitë falas”, tha ai.
Ahmetaj u shpreh se pas goditjes nga pandemia, “rritja ekonomikë e vendit është e shpejtë, gati 18 përqind, por është e pamjaftueshme për të akseleruar ashtu siç duam ne, aty ku duam ne dhe aq sa duam ne varfërinë në vend”.
Sipas Ahmetajt, vendi ka bërë reforma të rëndësishme.
