Socialistët, ashtu edhe siç pritej, janë shprehur kundër propozimit të aleatit të tyre në qeverisje, LSI, për një sistem zgjedhor me lista të hapura, në zgjedhjet e ardhshme parlamentare.
Bashkëkryetari socialist i komisionit të posaçëm të Reformës Zgjedhore, Taulant Balla u shpreh kundër propozimit të djeshëm të aleatit të tyre të vogël.
“Jam kundër çdo forme që ndërhyn në sistemin zgjedhor. Me këtë sistem janë bërë dy palë zgjedhje”, tha Balla.
Por LSI sot i rikujtoi PS, grevën e urisë së deputetëve në vitin 2008. “Çështja e listave të hapura është problem jo i ri, një qëndrim konsistent i yni për ata që kanë një memorie të vëmendshme ne e kemi kërkuar që në 2008 dhe është mbrojtur fort nga ne. Pra s’është që lind sot paraqitet dhe propozohet sot, kanë qenë raporte të vështira, kujtojmë historinë e 2008 e rimarrim që në një klimë të re më konstruktive krijonte një hapësirë të re për ta rimarrë çështjen. S’besoj të jetë tabu se s’ka të bëjë me interesin e LSI por interesin e një procesi sa më përfaqësues në këtë çështje”, tha Petrit Vasili i LSI.
