Dje u publikuar letra që Ministri i Brendshëm Saimir Tahiri i ka dërguar sekretarit të Përgjithshëm të INTERPOL-it, Jurgen Stockkrei ku kërkon rishqyrtimin dhe rivlerësimin e urdhër-arrestit ndërkombëtar për ish-kryeministrin e Kosovës Ramush Haradinajn.
Tahiri mes të tjerash përshkruan edhe detaje të arrestimit të Haradinajt.
Por në këtë letër bie në sy një detaj që mund të konsiderohet si një lapsus apo më saktë mos informim i Tahirit; vendi i arrestimit.
Tahiri shkruan se ka ndjekur me shqetësim arrestimin e ish-kryeministrit të Kosovës në 4 janar në Paris, por në fakt Haradinaj nuk është ndaluar në kryeqytetin francez, por në Aeroportin ndërkombëtar Basel-Mulhouse, qindra kilometra larg Parisit.
“Nga ana tjetër, kam ndjekur me shqetësim të madh arrestimin e ish-Kryeministrit të Kosovës, njëherazi dhe një nga udhëheqësit e luftës së Kosovës kundër genocidit serb, Ramush Haradinaj, në Paris në datë 4 janar 2017, në zbatim të një Urdhër Arresti të INTERPOL-it”, shkruan Tahiri.
