Kryetari i Partisë Demokratike, Lulzim Basha, tha sot se janë depozituar në Kuvend, amendamentet Kushtetuese, që do të shpëtojnë shqiptarët.
Basha paralajmëroi se përmes këtyre amendamenteve garantohet një proces zgjedhor i lirë, vendi do të futet në shinat e shtetit të së drejtës, duke shtuar se patronazhistët dhe kreun e tyre do i gjejë belaja.
“Do të zhbëhen ndryshimet Kushtetuese të 30 korrikut, sikundër Komisioni Parlamentar për reformën zgjedhore, duhet të nisë punimet një orë e më parë nga puna”, tha Basha.
Kreu demokrat tha se gjithashtu do t´i jepet fund një pushteti vendor me 61 bajraktarë, që bashkë me të punësuarit e tyre, i grabisin buxhetin të shtetit 120 mln dollarë më shumë se sa kur kishim mbi 371 njësi vendore.
“Pushteti vendor duhet të jetë më pranë qytetarë, pasi sot ata nuk po marrin asnjë shërbim”, tha Basha. Ai u shpreh se amendamentet e PD parashikojnë krijimin e bashkive rurale dhe urbane, por pak rëndësi ka si do të quhen.
Kreu demokrat tha se çështja e 3-të ka lidhje me vettingun e politikanëve, për të cilën Venecia në Opinionin e saj ka thënë që në vitin 2018 që është i domosdoshëm.
Basha u shpreh se politika, përfshi kryetar bashkish apo politikanë të nivele më të larta, duhet të pastrohet nga lidhjet me krimin.
“Politika nuk duhet të vetojë politikën, ndaj në propozimin Kushtetues, kjo detyrë i kalon SPAK, një institucion kushtetues, ku janë investuar milionat e taksapaguesve shqiptarë, europianë dhe shqiptarë”, tha Basha, sipas të cilit ky institucion duhet të ndëshkojë politikanët e lidhur me krimin dhe të korruptuar.
