Ish-kapiteni i kombëtares shqiptare të futbollit, Lorik Cana është personaliteti i rradhës që i bashkohet listës së personazhe që kanë kërkuar lirimin e ish-kryeministrit të Kosovës, Ramush Haradinaj, i arrestuar në Francë për llogari të autoriteteve serbe.
Përmes një postimi në Instagram në gjuhën franceze,Canaj shprehet se arrestimi i Haradinajt është një veprim i motivuar politikisht.
“Desha të jap gjithë mbështetjen time për z. Ramush Haradinajn, i cili edhe një herë është persekutuar nga një urdhër-arrest ndërkombëtar, i lëshuar nga shteti serb dhe i cili është i motivuar politikisht, për faktet që z. Haradinaj është shpallur i pafajshëm dy herë nga Tribunali Penal Ndërkombëtar!!!”.
“Të gjithë shpresojmë që drejtësia franceze ta lejojë kthimin e shpejtë të z. Haradinajt te familja e tij. Miqësisht, Lorik Cana”, shkruan Canaj.
Një pjesë të gjatë të karrierës së tij, Cana e ka kaluar në Francë, si pjesë e ekipeve Paris Saint-Germaini (2000-2005), Marseille (2005-2009) dhe së fundmi te Nantes (2015–2016).
