Nuk dihet nëse ka lidhje me krizën e fundit që ka kapluar vendin pas rritjes së çmimeve, por Ministria e Financave përmes një kërkese drejtuar Drejtorive Arsimore, kërkon kthimin mbrapsht të atyre që konsiderohen si fonde të lira.
Madje në e-mail sygjerohet që të mbahen fonde vetëm për dy pagat në vijim të arsimtarëve.
“Ministria e Financave u kërkon të gjithë institucioneve të arsimit, kthimin pas të të gjithë fondeve të lira (të pagave), duke u lënë shkollave vetëm pagesat e mësuesve për muajt tetor dhe nëntor. Pjesa tjetër duhet tu kthehet pas Ministrisë”, thuhet në një denoncim të mbërritur në Fax News.
Sipas ministrisë, kjo po bëhet për “disa shërbime prioritare të qeverisë”.
Njoftimi me email u ka shkuar të gjitha shkollave duke i pyetur se sa lekë kanë gjendje. Referuar denoncimit, Ministria e Financave ka kërkuar përgjigje urgjente sot.
E ndërkohë që shpenzimet e luksit të Qeverisë, qoftë edhe për mbrëmje gala, apo tendera disa miliona euroshe as nuk ndalen as nuk shtyhen në kohë, duket se Financat po mendojnë të grumbullojnë fondet nga institucionet arsimore.
