Trajneri i Kombëtares U-21, Alban Bushi ka dalë në konferencë për mediet të mërkurën, ku ka folur për sfidat e radhës në eliminatoret e Europianit 2023.
Kuqezinjtë do të luajnë sot ndaj Andorrës në “Elbasan Arena”, teksa 4 ditë më pas do të sfidojnë Slloveninë po në Elbasan.
Duke iu përgjigjur pyetjeve të gazetarëve, Bushi shprehet se përfaqësuesja e 21-vjeçarëve është e motivuar për të bërë një ndeshje të mirë dhe për të lënë pas humbjen e fundit në çeki. Tekniku thekson se në grupin e lojtarëve të thirrur ka elementë cilësorë të cilët mund të bëjnë diferencën dhe se objektivi i vetëm ndaj Andorrës është marrja e tre pikëve.
Gjithashtu, Bushi është i kënaqur me punën e bërë me ekipet kombëtare të moshave, që vitet e fundit kanë prodhuar shumë lojtarë të cilët tashmë japin kontributin e tyre në Kombëtaren A.
Duke folur për sfidën ndaj Andorrës, Bushi theksoi se, “me Andorrën brenda një viti e gjysmë kemi luajtur 3 ndeshje, dy i kemi fituar dhe një kemi marrë barazim atje. Është një ekip që ne e kemi vlerësuar maksimalisht, si nga ana e stafit, po ashtu edhe lojtarët. E shohim si të kemi Gjermaninë përballë, mezi e presim si ndeshje për të thënë që nuk jemi ne ata që kemi humbur në Çeki, por ishte një humbje momentale dhe ekipi duhet të reagojë dhe kjo ndeshje ka një domethënie të madhe. Ashtu si Andorra, edhe ne jemi një ekip modest, por ne kemi shpirtin e garës dhe luftën për të fituar një ndeshje e kemi shumë të madhe. Nëse na mungon kjo atëherë kemi probleme. Mendoj se këtë radhë nuk do të na mungojë”.
Për sfidën ndaj Sllovenisë, Bushi tha se, “do të jetë një kundërshtar i vështirë, por vëmendja dhe objektivi janë tre pikët me Andorrën”.
“Mendoj që humbjet nuk sjellin gjëra negative, kështu mendoj unë dhe këtë i kam transmetuar edhe lojtarëve. Çdo humbje ka gjërat pozitive që ne kemi mësuar shumë nga humbja me Çekinë, kemi parë defektet se pse kemi humbur. Disa lojtarë nuk kanë dhënë maksimumin pas golit të dytë, ky është futbolli. Ne nuk duhet të ulim kokën por duhet të vazhdojmë përpara për ta kthyer ndeshjen. Siç kemi bërë edhe me Andorrën në ndeshjen e kaluar në Elbasan. Mendoj se si humbjet edhe fitoret duhet t’i harrojmë dhe këtë i them edhe çunave, pasi edhe nëse fitojmë kjo harrohet pas 24 orëve. Ky është futbolli, duhet të kesh vazhdimësi. Gjithashtu, edhe humbjet. Mendoj se nesër do të bëjmë shumë mirë”, tha Bushi.
