Nga Gjirokastra ku po zhvillon takimin me anëtarët e PD-së, ish-Kryeministri Sali Berisha tha se Partia Demokratike do të dalë më e fortë dhe më e bashkuar se kurrë më parë nga ky proces.
Ndërsa e ka cilësuar Lulzim Bashën një ish-Kryetar të PD, Berisha tha se ai harron se ka vetëm 1 votë, sikundër të gjithë anëtarët e PD, ndaj dhe s´mund të marrë vendime në emër të Partisë Demokratike.
“Ne nuk kemi asgjë me ata që mbajnë qëndrime të ndryshme, por ajo që duhet të na bashkojë është vota”, tha Berisha. Duke e cilësuar Bashën një peng të marrë nga Edi Rama, Berisha tha se do të jenë anëtarët e PD që me votën e tyre do të marrin vendimet, për ta bërë partinë edhe më demokratike seç ka qenë kurrë më parë.
“Kemi 30 vite në këtë rrugë dhe kemi mësuar 30 herë më shumë. Ne do e kthejmë PD në një parti ku vota e anëtarëve do të jetë në piedestal. Do të vendosim primaret, ku vota juaj do të jetë përcaktuese”, tha Berisha.
Ai tha se ftonte të gjithë demokratët që të bashkoheshin në Partinë Demokratike dhe të jepnin kontributin e tyre për këtë parti, pavarësisht largimeve të viteve të fundit.
“Ftoj të gjithë delegatët e Kuvendit Kombëtar, të firmosni për mbledhjen e Kuvendit. Si të doni votoni në Kuvend, por firma juaj është ndërgjegjia juaj për një PD që respekton votën e lirë.
Ju e shihni se ç’po ndodh. Peng-kryetarin e ka marrë në patronazh qeveria me propagandën e saj.
Ka të tjerë që përpiqen t’u mbushin mendjen shqiptarëve se nuk ka rëndësi procedura, nuk ka rëndësi vota. Këta janë mercenarë.
Në këtë pikë ne ndahemi me çdo njeri. Ata për të cilët procedura nuk ka rëndësi, vota nuk ka rëndësi, forumet nuk kanë rëndësi, janë mercenarë që nuk e duan demokracinë.
Me gjithë të tjerët na bashkon vota e lirë.
Ndaj dua t’ju përshëndes dhe t’ju falënderoj për këtë pritje të jashtëzakonshme dhe t’ju siguroj se me përpjekje të përbashkëta do dalim nga kjo betejë më të bashkuar, më të pavarur, më të fortë dhe më të sigurt në fitoren që na pret,” tha Berisha.
