Safet Gjici konfirmon Diego Longon në krye të pankinës së Kukësit. Presidenti i nderit te verilindorët, gjatë një prononcimi në emisionin “Procesi Sportiv” në “Top Channel”, pohon se te Kukësi nuk ka asnjë problematikë të tillë dhe se të enjten italiani do të rikthehet në Shqipëri për të vazhduar punën me skuadrën.
“Longo është trajner i Kukësit dhe nuk është vënë në diskutim asnjë sekondë pozita e tij te Kukësi. Ka dhënë maksimumin e mundshëm, ku po prodhon lojë shumë të mirë. Janë luajtur vetëm katër javë kampionat, ndaj nuk duhet të mendohet kurrë që trajneri pas katër javësh të shkarkohet. As nuk e kam pasur ndërmend dhe as klubi nuk ka ndërmend ta zëvendësojë. Bëhet fjalë për një trajner shumë punëtor, kërkues, korrekt, i disiplinuar dhe nuk ka arsye që të shkarkohet.
Unë kam biseduar pas asaj që shkroi ‘Panorama Sport’ dhe ai nuk më ka shfaqur asnjë pakënaqësi, as nuk ka thënë që ka kërkuar dorëheqjen dhe as ka dhënë dorëheqjen. Por, do flasë me klubin pse në dy ndeshjet e fundit nuk arriti te fitorja. Ndeshja me Laçin na preku të gjithëve, sepse në minutën e 95-të pësuam një gol pas një gabimi tonin.
Për këto katër javë Kukësi ka luajtur mirë dhe ka dhënë një sistem loje tjetër nga vitet e kaluara dhe nuk ka arsye pse trajneri të shkarkohet. Natyrisht nëse ka probleme të natyrës së ndërhyrjeve, por këtu nuk ka ndërhyrje nga jashtë si në ekipet e tjera.
Ai kishte prerë biletën në Itali më herët për të takuar familjen, ndërsa të enjten ai kthehet në punë dhe nuk ka asnjë lloj problemi”, sqaroi Gjici, i cili më shumë e konsideroi si një keqkuptim të teknikut deklaratën që ka bërë në fund të ndeshjes, duke mos e vënë në diskutim vijimin e tij në krye të skuadrës.
