Taulant Xhaka ka reaguar në lidhje me deklaratën e Edi Rejës, i cili në konferencën e zakonshme për shtyp u shpreh që mesfushori nuk i është përgjigjur pozitivisht ftesës së tij. Sipas lojtarit të Baselit, kjo nuk është e vërtetë.
Për RTSH Sport është shprehur se ka pasur një bisedë me Ervin Bulkun duke i udhëzuar këtij të fundit të merrnin një lojtar tjetër pasi nuk ishte në 100 përqind të formës së tij. Luftaraku i mesfushës ka thënë:
“Taulant Xhaka kurrë nuk e ka refuzuar Kombtaren! I kam thënë Bulkut që nuk jam akoma 100% në formën time dhe më mirë ishte që të merrte një lojtar qe eshtë 100% në formë.
Këto janë gënjeshtra dhe nuk e di pse. Nuk është aspak e vertetë që unë kam refuzuar Kombëtaren, por isha 1 vit i lënduar dhe nuk isha në 100% në formë dhe nuk dua të rrezikoj prapë që të lëndohem. Në këtë mënyrë, i kam dhënë shansin një lojtari të ri që të grumbullohet”, ka përfunduar ai.
Deklarata e Rejës mbi “çështjen” Xhaka:
“Më vjen keq për Xhakën, për cilësitë që ka do të na jepte një dorë shumë të mirë, por ai e ka refuzuar ftesën. Unë e kam ftuar disa herë, edhe vitin e kaluar edhe së fundmi, por ai nuk është përgjigjur pozitivisht, kështu që është e kotë që të vazhdoj të shpresoj dhe t’i dërgoj ftesa për faktin që ai nuk po vjen. Nuk na e ka thënë pse nuk vjen, ndoshta ka vendosur të fokusohet te klubi. Më vjen keq, pasi është një lojtar me eksperiencë, por faktet janë këto”.
