Një tjetër produkt i është shtuar gamës së produkteve ushqimore që eksportohen nga Shqipëria. Uji i ambalazhuar është një artikull që po depërton tashmë në vendet e rajonit. Është marka “Dukat” që prej disa muajsh po futet me sukses në tregun e vendit fqinj, Malit të Zi.
Shqipëria është një vend me burime të konsiderueshme ujore. Ajo llogaritet të jetë në vendin e tretë në Europë për rezerva ujore për frymë. Burime nëntokësore dhe rrjedha sipërfaqësore ushqejnë sot dhjetëra impiante që merrem me përpunimin, ambalazhimin dhe tregtinë e ujit në shishe. Vitet e fundit industria e ujit në Shqipëri është duke u rritur dhe zhvilluar me hapa të shpejtë.
Konsumatorët janë tashmë të ndërgjegjshëm për rëndësinë që ka cilësia dhe siguria e ujit në shëndetin e tyre. Sipas Qendrës Botërore për Kontrollin dhe Parandalimin e Sëmundjeve, uji i pijshëm nga çezma në Shqipëri nuk është i sigurt. Mungesa e sigurisë për të përdorur si ujë të pijshëm atë të rrjetit, kanë bërë që në Shqipëri të lulëzojë industria e ujit.
Kompanitë e ujit të ambalazhuar pohojnë se eksportet kanë shënuar rritje, sidomos vitin e fundit. Së fundmi, kompania “Dukat” ka lidhur marrëveshje me partnerë në Malin e Zi, duke bërë që ky produkt “Made in Albania” të shpërndahet në disa qytete të vendit fqinj, veçanërisht gjatë sezonin turistik.
Me vetëm dy vjet në tregun shqiptar, “Dukat”, ka marrë pëlqimin e konsumatorit vendas, dhe po i drejtohet tashmë tregjeve të huaja. Kompania shprehet e sigurt se ky produkt do të pranohet edhe nga konsumatori i huaj. Ata pohojnë se eksportet janë e ardhmja e kësaj industrie, ndaj dhe prodhimi për tregun e huaj do të jetë një orientim i saj.
