Deputeti i Partisë Demokratike në qarkun Elbasan, Lefter Gështenja, u shpreh sot se “papunësia në këtë qark ka arritur kulmin, ndërsa në 5 zona në Elbasan
nuk ofrohet asnjë vend pune”.
“Qeveria e ka shndërruar në tokë të djegur Librazhdin, Prrenjasin, Cërrikun, Peqinin, Belshin. Nuk ka asnjë vend pune që të rinjtë, të diplomuarit, profesionistët të mund të punojnë, te fitojnë dhe të jetojnë në zonën tonë. Shikoni të dhënat e vetë qeverisë së papunësisë nga Agjencisë Kombëtare e (Sh)punësimit”, u shpreh ai.
Deputeti demokrat shkroi se në Librazhd, Prrenjas, Peqin, Cërrik, Belsh nuk ka asnjë vend pune të lirë as në shtet, as në privat.
“I vetmi vend pune është në Gramsh. Treva jonë duhet të ishte ndër më të pasurat e vendit dhe të siguronte me mijëra vende pune në turizëm, bujqësi, tregti apo industri të vogla. Ky është një realitet që sjell vetëm shpopullim, varfëri, nënshtrim. Ndryshimin e kemi në dorë vetë! Duhet ndryshim me demokratët”, shkroi në një postim në rrjetet sociale.
