Kryeministri Edi Rama u shpreh këtë të Hënë nga Prishtina se e drejta është me Kosovën, në situatën konfliktuale të ndezur së fundmi me Serbinë.
“E drejta këtu është me Kosovën dhe pikë. S’është me Serbinë. Serbia s’ka asnjë të drejtë ti kthejë targat në një konflikt të përditshëm, që mizat po i bën buall”, u shpreh në një konferencë të poërbashkët me Albin Kurtin, Edi Rama, i cili apeloi që konflikti të zgjidhet me dialog.
Vendosjen e trupave ushtarake serbi në kufirin me Kosovën, Rama e quajti një teatër të rrezikshëm. Ai u shpreh dhe kundër shfaqjes së ambasadorit rus aty. “Se ça do ambasadori rus aty… natyrisht ky është një teatër, por i rrezikshëm”, tha Rama.
Ndërkohë, kryeministri i Kosovës Albin Kurti u shpreh i gatshëm që qeveria e Kosovës të heqë urdhrin për targat, nëse nga Serbia veprohet në të njëjtën mënyrë. Kurti po u ashtu u shpreh i hapur për dialog.
Rama nuk heq dorë nga mini-shengeni
Kryeministri Edi Rama, pavarësisht deklaratave pro Kosovës në raport me situatën e krijuar me Serbinë, mbështeti dhe mini-Shengenin Ballkanik – nismë e Ramës, Vuçiç e Zaev, kundërshtuar nga Kosovë.
“Ballkani i hapur është rruga jonë e përbashkët për të mirën tonë të përbashkët”, tha Rama.
“Kemi një mosdakortësi me Albinin në këtë pikë e natyrës politike, duhet ta trajtojmë si të tillë. Marrëdhëniet tona nuk ndikohet nga fakti që kemi një mosdakortësi të kësaj natyre. Themeli i dakortësisë sonë është i natyrës kombëtare, vëllazërorë. Ai është themeli që përcakton marrëdhënien tonë”, shtoi ai.
“Ballkani i hapur është i veti drejtim strategjik që të mos ngecim në baltën e të shkuarës në mënyrë ciklike”, u shpreh Rama më tej, që e cilësoi “Ballkanin e Hapur” përshpejtim të Procesit të Berlinit.
I pyetur nga gazetarët, Rama tha se nuk ka folur me kryeministrin e Serbisë, Aleksandër Vuçiç rreth çështjes.
