Ish-Kryeministri Sali Berisha iu përgjigj nga Fieri kreut demokrat Lulzim Basha, lidhur me deklaratat e tij që i konsideroi takimet si anti-amerikane.
Berisha tha se vendimet e marra pa pyetur forumet e partisë, duke shkelur statutin dhe pa mbledhur asnjë forum, nuk kanë lidhje me Amerikën, por me Kinën.
“Lulzim Basha është ish-kryetari apo peng-kryetari, i cili thotë se sot ne jemi anti-amerikanë, ndërsa një demokrate në një letër të hapur shprehet se vendimet e tij janë si ato të Kinës”, u shpreh Berisha.
Ish-Kryeministri u shpreh se nuk mund të pranojë kurrën e kurrës një vendim politik të Sekretarit amerikan të Shtetit, ndërsa shtoi se ditën që do të paraqiteshin dokumente me prova dhe fakte, ai do të dënonte veten e tij.
“Problemi është si do ia nxjerrim nga hundët Edi Ramës votat që grabiti. Rama i imponoi pengut të tij një vendim vetë-vrasës politik.
I ftoj të gjitha strukturat e PD a jeni ju për t´u shkelmuar nga Kryetari apo do i tregoni vendin Kryetarit? A jeni ju anti-amerikanë apo është Kryetari një peng sharlatan? Pse nuk vjen Lulzim Basha te ju, përkundrazi thërret kryesitë në Tiranë, ndërkohë që duhej të shkojë në rrethe t´u japë shpjegime demokratëve. Ju ftoj të behni misionarë, sot është mision si në 1991 që të ngremë opozitën shqiptare fuqishëm, e goditur shumë rëndë nga pengmarrjet dhe pabesitë”, tha Berisha.
