SHÇBA njoftoi sot se kishte parandaluar një sulm kibernetik në sistemin e saj. SHÇBA bënte të ditur se serveri qendror nuk ishte prekur dhe të dhënat sekrete nuk janë arritur të merren nga hacker-at.
Në njoftim nuk thuhej se nga kishte ardhur sulmi, apo nëse IT e institucionit të kishin arritur të identifikonin hacker-at/in.
Zyrtarisht SHÇBA tha se reagimin e jepnin pas interesimit të mediave.
Po çfarë mund të ketë ndodhur me serverat e SHÇBA, a ka pasur vërtet një sulm kibernetik dhe nëse po kush mund të ketë tentuar sulmin, i cili mund t´i cënonte karrierën drejtorit të këtij institucioni, Muhamet Rrumbullaku?
Emri i këtij të fundit është lakuar në media si një nga pasuesit e Ardi Veliut në postin e Drejtorit të Përgjithshëm të Policisë së Shtetit. Veliu, pavarësisht se është konsideruar si njeriu me pozita të forta në krye të Policisë, për shkak të suportit edhe nga Kryeministri Edi Rama, mund të humbasë funksionin për shkak të përplasjeve në rradhët e vetë mazhorancës.
E nëse për dështimet në drejtimin e Policisë ai duhej të ishte larguar prej kohësh nga funksionet drejtuese, duket se rreziku për karrigen e Kryepolicit po i vjen nga lufta e brendshme.
Referuar raportimeve mes Kryepolicit Veliu dhe ministrit të Brendshëm, Bledi Çuçi, ka pasur përplasje të vazhdueshme, të cilat në jo pak raste janë shuar nga Kryeministri. Por ky i fundit pas marrjes së mandatit të 3-të vendosi një afat 100 ditor për rezultatet në polici, afat që përfundon në fund të muajit dhe që dukej më tepër si një paralajmërim për atë që pritet të ndodhë me kupolën e Policisë së Shtetit.
Një largim i mundshëm i Veliut, mund të çojë në krye të Policisë së Shtetit, Rrumbullakun, që dikur nga socialistët konsiderohej si “anëtar i grupit çiftelia” referuar një fotoje që u publikua rreth 10 vite më parë, në një nga lokalet në një prej zonave periferike të Tiranës.
Vite më pas Rrumbullaku duket se u rehabilitua nga Rilindja, u emërua në krye të SHÇBA, dhe sot për hir të gradave dhe viteve që ka në Policinë e Shtetit, mund të jetë një nga emrat që mund të marrë drejtimin e këtij institucioni.
Rrumbullaku u emërua në krye të SHÇBA nga Sandër Lleshaj, pak pasi u emërua si Ministër i Brendshëm, ndërsa Veliu u vendos nga Fatmir Xhafaj në krye të Policisë së Shtetit.
Për t´iu kthyer njoftimit nga SHÇBA lidhur me sulmin kibernetik, përtej asaj se veprimi mund të ketë pasur si qëllim thyerjen e sigurisë së serverit qendror dhe shkarkimin e materialeve sekrete, ndoshta sulmi mund të ketë pasur si qëllim edhe goditjen e drejtuesit të kësaj strukture pranë Ministrisë së Brendshme.
Dhe një rrëzim i sigurisë së serverit ndoshta do të përbënte ndonje nga skandalet e mëdha që do t´i mbyllnin karrierën Rrumbullakut, përtej asaj se për çfarë mund të përdoreshin dokumentet sekrete.
