Ministri i Brendshëm, Bledi Çuçi paraqiti para Kuvendit prioritetet e ministrisë së tij në qeverinë “Rama 3”.
Lidhur me kontrollin e territorit, ai tha se “veçse do strukturojmë policinë e shtetit, çdo kilometri katror do i caktojmë një trupë policore për të pasur kontakt të përditshëm për çdo dhunimi që i bëhet”. “Do fusim në përdorim dhe pajisje superinteligjentë për të kombinuar këtë kontroll, në mënyrë që asnjë centimetër katror të mos dhunohet më”, shtoi.
Në lidhje me sigurinë rrugore, deklaroi se “do të nisim edhe një herë rishikimin e legjislacionit për të forcuar masat ndëshkuese në Kodin Rrugor. Do rrisim investimet në sistemin e monitorimit të trafikut dhe digitalizimin e proceseve që lidhen me përdoruesit e makinave apo sjelljen e tyre. Në këtë mandat synohet vendosja e kamerave në çdo kryqëzim të Shqipërisë”.
“Në luftën e krimit të organizuar do vijojmë me parimin ‘ndiq paranë’. Do rishohim strukturën e krimit ekonomik në policinë e shtetit me mbështetjen e asistencën e policisë federale gjermane. Shumë shpejt do paraqitet në parlament kjo strukturë”, deklaroi.
Çuçi bëri me dije se do ulet mosha mesatare e strukturës policore.
