Deputetja demokrate e Qarkut të Elbasanit, Flutura Açka, ka reaguar lidhur me përplasjet e krijuara në PD pas vendimit të kreut demokrat, Lulzim Basha, për përjashtimin e ish-Kryeministrit Sali Berisha ka grupi parlamentar.
Në emisionin “Zona Zero”, Açka tha se PD është më e madhe se Lulzim Basha dhe Sali Berisha.
Megjithëse ppranon se nuk ka shumë kontribute në PD, Açka shprehet se ajo që duhet të kihet parasysh në gjithë debatin që zhvillohet është fakti se partia është më e madhe se çdo drejtues i saj.
“Nuk mund të marr dot krah në respekt të çdo demokrati, por sigurisht që kam tronditje. Besoj se PD do dalë më e fortë nga kjo tronditje. Kam bindjen që kjo ngjarje do ta forcojë Partinë Demokratike.
Unë do të kisha dashur një Berishë që të ikte nga PD me duartrokitje. Është një nga zotërinjtë e PD dhe si i tillë ai do largohet. PD është e detyruar që të kalojë në këtë proces dhe të bëhet më e fortë. Partia është e para”, tha Açka.
Kreu demokrat Lulzim Basha mori vendimin për përjashtimin e Berishës nga Grupi Parlamentar, ndërsa e cilësoi si “vendimin e jetës”, por sqaroi se ai vinte pas presionit të aleatit strategjik, SHBA, që nuk pranonte asnjë negociatë.
Berisha ka reaguar ashpër duke e cilësuar vendimin si anti-statutor, madje të enjten nis edhe lëvizjen e tij brenda partisë në takimet me anëtarësinë, që mund të finalizohen me një referendum të anëtarëve për t´u shprehur lidhur me vendimin e kreut demokrat.
