Përfaqësuesi i LVV Arbër Zaimi ka folur mbi pasojat e protestave të dhunshme në Malin e Zi, ndërsa theksoi se baza e stabilitetit në Ballkan do të ishte nëse lidershipi i Serbisë dhe kishës ortodokse serbe nuk do të vazhdonte me interferimin në politikën e vendeve fqinje.
“Opinionin, që më është dukur më i saktë mbi këtë temë, e kam lexuar në gazetën Standart i Vienës, i cili thotë që baza e stabilitetit në Ballkan do të ishte nëse lidershipi i Serbisë dhe kishës ortodokse serbe nuk do të vazhdonte me interferimin në politikën e vendeve fqinje.
Ndërhyrja e elitës politike serbe dhe e kishës ortodokse serbe në vendet fqinje është arsyeja e luftërave katastrofike të Ballkanit në vitet ’90. Vuçiç dhe regjimi i tij sot po bëjnë të njëjtën gjë si në vitet ’90, por me shumë aftësi taktike. Aleati i tij i afërt, ministri i Brendshëm Vulin, flet për botën serbe dhe nuk flet më për Serbinë e Madhe, vetë Vuçiç flet si viktimë dhe Serbinë e paraqet si viktimë dhe thotë se BE nuk po e do Serbinë, kur në fakt është Serbia ajo që nuk po bën asnjë hap drejt Perëndimit, por vazhdon të ruajë lidhjet gjeostrategjike, ekonomike dhe ushtarake me Rusinë dhe Kinën”, theksoi Zaimi në studion e Syri Tv.
Sipas tij, me ngjarjet në Malin e Zi, kemi të bëjmë me rishfaqje të projektit të vjetër serb, e shohim të shfaqet gati çdo dy javë apo një muaj, ndonjë ngjarje e tillë që reflektohet edhe në Tiranë dhe Prishtinë.
“Para tre javësh kur amerikanët u tërhoqën nga Afganistani, kishim zyrtarë të lartë të Serbisë që shfaqën edhe një dëshirë të dështimit të SHBA edhe në Kosovë. Edhe dje e pamë në klerikët e lartë të kishës ortodokse, të cilët këndonin vargjet që kur të kthehet edhe njëherë ushtria serbe në Kosovë.
Në prizmin partiak, në Mal të Zi është një shumicë e brishtë, e cila vazhdon të qeverisë pa e pasur shumicën numerike parlamentare me 50 %.
Në raste të tilla partitë mund të bëjnë tensione për të ardhur në pushtet më shpejt, por kjo është më e thellë se kaq. Sot Ivica Daçiç, kryeparlamentari kishte fajësuar politikanin opozitar të Serbisë Çanak, e kishte akuzuar për nxitjen e trazirave në Mal të Zi, i cili paska shkuar për të mbështetur aksionin opozitar në Mal të Zi kundër shugurimit të mitropolitit serb në Cetinë”, tha ai.
