Çdo vit, miliona njerëz në mbarë botën, marrin vaksinën e gripit, për t’u mbrojtur nga sëmundje të ndryshme, të cilat në disa raste mund të komplikohen dhe të kërkojnë shtrimin në spital, apo mund të rezultojnë fatale.
Pneumonia, bronkiti, infeksionet e sinusit dhe infeksionet e veshit janë disa shembuj të ndërlikimeve që lidhen me gripin. Nëse keni një gjendje shëndetësore të caktuar me sëmundje bashkëshoqëruese, si sëmundje të zemrës, kancer apo diabet, gripi mund ta përkeqësojë këtë gjendje më tej. Gjithashtu duke qenë se në mbarë botën vijon të qarkullojë koronavirusi, marrja e vaksinës së gripit, është e rekomanduar për të ulur riskun sëmundjes me Covid dhe grip, njëkohësisht.
Vaksina e gripit të influenzës, është e ndryshme në çdo vit dhe modifikohet sipas sëmundjeve që qarkullojnë gjatë sezonit të gripit, sipas territorit ku banoni.
Qendra për Kontrollin dhe Parandalimin e Sëmundjeve në SHBA, CDC, rekomandon që shumica e njerëzve të vaksinohen kundër gripit, me disa përjashtime.
Konkretisht, CDC rekomandon që çdo person mbi 6 muaj, të vaksinohet me vaksinën e gripit.
Fëmijët 6 muajsh deri në 8 vjeç mund të kenë nevojë për dy doza gjatë një sezoni të vetëm gripi. Gjithë të tjerët kanë nevojë për vetëm një dozë në çdo sezon gripi
Veçanërisht personat mbi 65 vjeç duhet të vaksinohet herët, duke filluar që nga fundi i korrikut dhe gushti.
Foshnjat nën 6 muaj nuk duhet ta marrin vaksinën dhe po kështu personat të cilët kanë alergji nga ndonjëri prej ingredientëve të vaksinës, që mund t’ju rrezikojnë jetën. Kjo mund të përfshijë xhelatinën, antibiotikët dhe ingredientë të tjerë. Personat që kanë alergji dhe sëmundje, duhet të konsultohen me mjekun. Gjithashtu, personat që kanë patur reaksion ndaj një vaksine gripi, nuk duhet ta marrin atë sërish.
Në Shqipëri, vaksinimi nis gjatë vjeshtës dhe është zakonisht falas për personat që janë më të rrezikuar nga komplikacionet që shkakton gripi.
