Dy grupe shqiptarësh, nga Shqipëria dhe Kosova, u përfshinë në një konflikt të dhunshëm mëngjesin e sotëm në Trieste, ku mbetën të plagosur 8 persona, njëri prej të cilëve në gjendje të rëndë.
Fillimisht mes dy grupeve pati një përplasje verbale, e cila degjeneroi në përdorimin e shufrave dhe mjeteve të tjera të forta, për ty përmbyllur me përdorimin e armëve të zjarrit.
Dyshimet e para janë se konflikti nisi rreth një çështjeje punësimi.
Të dy grupet, të përbëra nga rreth 15 persona, fillimisht u përballën me njëri-tjetrin para barit Royal në Carducci me shufra, duke hedhur karrige dhe stola mbi njëri-tjetrin.
Më pas njëri prej tyre nxori armën dhe filloi të qëllonte. Duket se një person i armatosur më pas u arratis për në Francesco, një zonë ngjitur dhe është në kërkim nga policia. Mediat italiane shkruajnë se policia ka arrestuar të paktën dy persona të armatosur, jo shumë larg vendit të ngjarjes, në një tentativë për tu larguar. Atyre i janë bllokuar edhe dy pistoleta, që dyshohet se tentuan t´i përdorin për të shpëtuar nga arrestimi.
Sipas dëshmive që pasqyrohen nga mediat, ngjarja ka ndodhur rreth orës 07:40 në via Carducci, në qendër të Triestes. Të gjithë personat e përfshirë në konflikt ishin të veshur me tutat sportive.
Disa dolën nga një makinë e errët, të tjerët nga një makinë e bardhë, disa me shkopinj druri, disa me armë, raportojnë mediat, duke iu referuar dëshmitarëve okularë, që njoftuan më pas Policinë.
“Pati një përplasje me hedhje karrigesh dhe stolash. Pastaj në një moment të caktuar erdhi një furgon dhe më shumë njerëz dolën jashtë, sikur të kishin thirrur përforcime. Kam dëgjuar 5 deri në 7 të shtëna. Një person ishte në tokë, ata u tërbuan dhe pati gjuajtje të tjera”, thotë një prej dëshmitarëve.
Një banakier që punon në një lokal, pikërisht përballë vendit ku ndodhi ngjarja, thotë se u ndjeh i frikësuar.
“Në fillim nuk e kuptova se çfarë po ndodhte. Njerëzit po ndiqnin njëri -tjetrin dhe me sa duket dukej se ishte një lojë mes tyre. Pastaj pashë një person tjetër në tokë i cili ishte pa ndjenja dhe kuptova se çfarë po ndodhte. Unë kam punuar këtu për 33 vjet, nuk kam parë kurrë një skenë dhune. Nuk kisha frikë,” rrëfen ai.
