Kryeministri Edi Rama tha se shteti shqiptar ka dhënë disponibilitetin për akomodimin e 4 mijë shtetasve afganë. Ai tha se nuk beson që do të arrihet në këtë numër, por për Europën situata me emigrantët do të vazhdojë.
Ai tha se shpenzimet për shtetasit afganë nuk do paguhen nga takspaguesit shqiptarë, ndërsa tha se synimi i tyre është largimi drejt SHBA, por ky proces do të zgjasë në kohë.
“Shpenzimet e afganëve nuk do të jenë të taksapaguesve shqiptarë dhe kemi patur dakordësi të plotë që për sa u përket shpenzimeve këto entitete, qeveria amerikane apo kushdo që merr përsipër do të mbulojnë shpenzimet e tyre. Kemi bërë ekzaktësisht atë që bëmë më familjet që humbën shtëpitë nga tërmeti, nuk kemi pranuar të ngremë një kamp. Unë kam thënë që kampe në Shqipëri për refugjatët nuk ka. Futja në kamp është çnjerëzore për ta dhe krijon problem edhe për Shqipërinë”, tha Rama.
Kryeministri nuk ishte në gjendje të deklaronte se sa kohë do të mund të qëndronin afganët në Shqipëri, por shtoi se referuar procedurave kjo mund të variojë edhe dy vite.
Gjithashtu Rama tha se afganët që do të duan të qëndrojnë në Shqipëri janë të mirëpritur.
