Dy persona janë arrestuar nga policia e Vlorës, të akuzuar për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Prodhimi dhe shitja e lëndëve narkotike” dhe “Kultivimi i bimëve narkotike”, të kryera në bashkëpunim.
Augest Lame, 28 vjeç, banues në fshatin Bestrovë dhe Detjan Selimaj, 35 vjeç, banues në fshatin Drashovicë, u vunë në pranga në kuadër të operacionit “Bestrova”.
Efektivët kanë sekuestruar një sasi lënde narkotike kanabis, armë zjarri, municion, etj.
Aksioni
Burime zyrtare bënë me dije se për ndalimin e këtyre dy personave,që u krye nga Seksioni për Hetimin e Narkotikëve, Forca e Posaçme Operacionale, Forca “Shqiponjat” dhe Komisariati i Policisë Vlorë, erdhi pas |informacioneve të marra në rrugë operative”. Policia sqaron se ka përdorur dron për lokalizimin e vendndodhjes së të dyshuarve.
“Këta shtetas dyshohen se në bashkëpunim me njëri-tjetrin, kanë kultivuar bimë të dyshuara kanabis sativa, në një sipërfaqe toke në vendin e quajtur ‘Çeplazet’, në fshatin Bestrovë. Gjatë kontrollit të ushtruar nga Policia, në ambientet ku qëndronin këta dy shtetas u gjetën dhe u sekuestruan në cilësinë e provës materiale një sasi lende narkotike kanabis, 4 armë zjarri automatike, municion luftarak, 3 radiomarrëse, 3 aparat celular, 1 automjet dhe 1 motomjet”, thuhet në njoftimin e policisë.
Hetimet e mëtejshme për rastin do ti kryejë prokuroria e Vlorës.
