Lihet në qeli autori i dyshuar i atentatit të ndodhur në Vlorë disa ditë më parë.
Në Gjykatën e Vlorës, u mbajt mesditën e sotme seanca për rivlerësimin e masës së arrestit ndaj 39-vjeçarit Bledar Selmanaj, i cili u la në burg.
Seanca gjyqësore zgjati afro dy orë, ku autori i dyshuar nuk pranoi asnjë akuzë të ngritur ndaj tij.
Ndërsa për Policinë, ishte Bledar Selmanaj ai që ekzekutoi 25-vjeçarin Xhuljano Bullarin.
Sipas burimeve nga Policia e Vlorës që po merret me hetimin e rastit, shkak për krimin është bërë konflikti midis tyre për pagesat rreth një sasie prej 100 kg lëndë narkotike kanabis sativa.
Dyshohet se 25-vjeçari dhe persona të njohur me të, kishin kryer pagesat me euro false. Shitja e sasisë së drogës ishte kryer në zonën e Elbasanit dhe blerësi kishte paguar me para false. Për këtë qëllim, Bullarit i kërkohej kthimi i pagesës i cilësuar si borxh. Bëhet fjalë për një shumë prej 3 mijë eurosh, për të cilën Selmanaj kishte kërkuar kthimin me ngulm, pasi duhej t’iu jepet kultivuesve të kanabisit në zonën e Vlorës. Nga ana e tij, Xhuljano ka refuzuar vazhdimisht kthimin e parave.
Ky, sipas hetuesve, ka qenë momenti që miqësia e nisur në qelitë e burgut të merrte një tjetër rrjedhë dhe të përfundonte në vrasje.
