Stadiumi i ri “Arena Kombëtare” është duke ecur me ritme mjaft të mira dhe pritet që të përfundojë në afatin e caktuar. Sipas anëtarit të Komitetit Ekzekutiv në FSHF, ecuria e punimeve është brenda pritshmërive. Kjo pasi momentalisht nuk ka asnjë pengesë dhe problematikë për firmën e ndërtimit, e cila është duke ecur me ritme të kënaqshme. “Pritet që në fund të muajit janar apo në fillim të shkurtit të ketë përfunduar plotësisht pjesa tokësore dhe të nisë ngritja mbi tokë e impiantit”, tha Dervishaj për “Panorama Sport”.
Sipas vëzhgimëve në impiantin e ri që po ndërtohet në kryeqytet ka pasur ndryshime dhe në projekt pasi tashmë do të bëhen dy parkime nëntoksore nga një që ishte parashikuar në projektin e parë. Siç është thënë nga drejtuesit e lartë në FSHF, ky impiant është parashikuar në kontratë që të përfundojë brenda dy viteve nga dita e nisjes së punimeve, pasi në rast të kundërt janë përcaktuar edhe disa penalitete.
Presidenti i FSHF-së ka deklaruar pak javë më parë se federata do ti bëjë një kërkesë UEFA-s dhe FIFA-s për të qenë kandidat për të mirëpritur finalen e Superkupës së Europës që do të zhvillohet në vitin 2019.
