Pas premtimit se do t’i jepet zgjidhje kërkesës së tyre, banorët e Zharrëzës lënë grevën e urisë.
Ndërkohë kompania naftënxjerrëse ka ndërprerë dje punimet, por nuk konfirmohet nëse kjo është bërë për shkak të ndonjë urdhri nga ministria e linjës në lidhje me tërmetet në zonën ku ata kryejnë gërmimet. Mesnatën e së martës, 12 grevistët e urisë kanë shkuar në shtëpitë e tyre. Vendimi për largim nga ambientet e grevës erdhi pasi kryetarja e Bashkisë së Patosit, Rajmonda Balili, u ka shkuar në ambientet ku zhvillohej greva dhe u ka komunikuar vendimin e Kryeministrit Rama për të plotësuar kushtet që ata kërkojnë.
Sipas banorëve, të cilët sërish janë skeptikë për këtë vendim, nëse nuk realizohen kërkesat e tyre, ata do të hyjnë sërish në grevë. “Po dalim nga greva, por sërish do jemi në pritje. Edhe pse kryeministri tha më herët se do ngrejë një grup për verifikime, nuk pranuam të dalim nga greva, sepse ne donim që dikush nga këta vendorët që njohim e takojmë përditë të na dalë garant. Kryeministrin s’kemi ku e takojmë. Fjalët i merr era. Vetëm kur na erdhi kryebashkiakja e Patosit e na doli garant se kryeministri e mban fjalën, ne po dalim. Por do të jemi në pritje të realizimit. Se me fjalë jemi ngopur”, u shprehën banorët.
Mësohet se kryetarja e Bashkisë Patos, Rajmonda Balili, u ka thënë banorëve se të gjitha institucionet do të jenë në dispozicion të kësaj çështjeje shqetë¬ suese për banorët. “Mos humbni kohë duke qëndruar këtu. Ne do të jemi në krahun tuaj. Greva nuk është zgjidhje kur ka probleme të tilla. Megjithatë, vendimi i Këshillit të Ministrave përcakton ngritjen e një komisioni me ekspertë të fushave, çka do të zgjidhë çështjen tuaj”, është shprehur kryebashkiakja për banorët.
