Interi ka zgjidhur edhe enigmën e goditjes së fundit të merkatos, që do të ishte me çdo kusht një sulmues. Largimi i Lukakut e bënte të domosdoshme afrimin e dy sulmuesve dhe Dzeko ishte i pamjaftueshëm për të përballuar sezonin.
I përzgjedhuri i Marottës dhe Inzaghit ishte Joaquin Correa, argjentinasi që njihet mirë nga trajneri zikaltër dhe takimi i sotëm me drejtuesit e Lazios ka prodhuar një document bazë për akordin. Ajo që kanë rënë dakort palët është vlerësimi i kartonit 30 mln Euro pasi më parë Lotito kërkonte të paktën 35 mln Euro ndërsa tani çështja ka kaluar te bonuset dhe mënyra e pagesës.
Formula e transferimit të 26-vjeçarit është huazim me të drejtë të detyruar blerjeje ndërsa Interi do të bëjë pagesën e 30 mln Eurove në tre këste nga 10 mln Euro ndërsa me sulmuesin akordi është arritur prej kohësh për një kontratë 4-vjeçare me page 3.5 mln Euro neto plus bonuset.
Me afrimin e Correas mbyllet edhe merkato hyrëse për Interin që tani i duhet vetëm të sistemojë lojtarët që nuk janë në planet e trajnerit si Pinamonti, Lazaro e ndoshta edhe një mesfushor mes Vecinos dhe Vidal.
