Nga BoldNews.al
Një firmë izraelite ka fituar tenderin 200 mijë USD të hapur nga SPAK për blerjen e pajisjeve ekzaminuese për celular. BoldNews.al ka siguruar dokumentet e këtij tenderi të hapur nga Prokuroria e Posaçme Kundër Korrupsionit dhe Krimit të Organizuar.
Fitues është kompania “Cellebrite” ltd nga Izraeli, e cila duhet ta sjellë këtë pajisje për 60 ditë. Në dokumente shkruhet se kompania ka qenë e vetmja në garë, ndërkohë që ka ofruar 17.191.044 lekë pa TVSH, pse me TVSH rreth 200 mijë USD.
Në dokumentet e siguruara nga BoldNews.al, thuhet se oferta e vetme ka qenë e kësaj kompanie. Kjo e fundit duhet të paraqitet brenda 25 ditëve për të lidhur kontratën.
Mësohet se SPAK ka kërkuar këtë pajisje për të ekzaminuar telefonat, për të gjetur historinë e komunikimeve apo për të rikthyer komunikimet telefonike apo edhe me mesazhe, qoftë edhe në rrjetet sociale. Por, nga një hulumtim i BoldNnews.al, rezulton se pajisja e kësaj kompanie, Cellebrite, hakohet. Dyshimet nuk janë të shqiptarëve, por të anglezëve. Madje, të gazetës “The Guardian”, e cila ka shkruar në vazhdimësi për problemet e kësaj kompanie.
“The Guardian” ka investiguar pajisjen e kompanisë izraelite, ndërsa i jep zë deklaratës së një eksperteje, e cila thotë se “kam hakuar mjetin e policisë për ekzaminim të telefonave”. Moxie Marlinspike akuzon firmën e mbikëqyrjes se është “e lidhur me persekutimin” në të gjithë botën.
Në një postim në internet, Moxie Marlinspike, detajoi një seri dobësish në pajisjet e mbikëqyrjes, të bëra nga kompania izraelite Cellebrite.
Marlinspike thotë se ato dobësi e bëjnë të lehtë për këdo që të vendosë kodin në një telefon që do të merrte pajisjet e Cellebrite nëse do të përdorej për të skanuar pajisjen.
“Lista e klientëve të tyre ka përfshirë regjime autoritare në Bjellorusi, Rusi, Venezuelë dhe Kinë; skuadrat e vdekjes në Bangladesh; juntat ushtarake në Mianmar; dhe ata që kërkojnë të abuzojnë dhe shtypin në Turqi, Emiratet e Bashkuara Arabe dhe gjetkë. Produktet e tyre shpesh janë lidhur me persekutimin e gazetarëve dhe aktivistëve të burgosur në të gjithë botën, por më pak është shkruar për atë që softveri i tyre në të vërtetë bën ose si funksionon”, shkruan “The Guardian”.
Sipas saj, forcat policore në të gjithë botën përdorin teknologjinë e Cellebrite për të ndihmuar në hetimet dixhitale, veçanërisht kur ata kanë arritur të marrin një pajisje fizike në pronësi të një të dyshuari ose personi me interes. Ndërsa Cellebrite është lidhur me përpjekjet për të anashkaluar pajisjet e koduara, shumica e mjeteve të tij janë ndërtuar për të lejuar ekipet dixhitale të nxjerrin informacione nga pajisjet e hapura, të ndezura dhe të automatizojnë llojet e kërkimeve.
