Kryeplaku i fshatit Qafëmollë, Azem Dedej, 52 vjeç, do të dalë sot para gjykatës pasi akuzohet për veprat penale “Kultivimi i bimëve narkotike”, kryer në bashkëpunim dhe “Shpërdorimi i detyrës”.
Ai dyshohet se ka bashkëpunuar me një 37-vjeçar, të identifikuar si Rexhep Halili dhe të dy u vunë në pranga gjatë një kontrolli të policisë në njësinë administrative Dajt, sepse dyshohet të kenë kultivuar bimë narkotike kanabis.
Në dëshminë e tij të siguruar nga gazetarja e TCH, Anila Hoxha, kryeplaku nënkuptoi se nuk kontrollon dot malin ndërsa shtoi se ka kryer kontrolle vazhdimisht dhe nuk ka konstatuar raste të mbjelljes së lëndëve narkotike. Nëse do kishte vënë re një gjë të tillë, thotë se do të njoftonte, ndaj e cilëson veten si të pafajshëm.
“Detyra si kryeplak i fshatit Qafë Mollë në Tiranë ka qenë formale më tepër për të pasur një komunikim midis komunitetit njësisë administrative dhe policisë së shtetit. Gjatë këtyre viteve janë thirrur në prezencë dhe të punonjësve të policisë së shtetit e u janë dhënë udhëzime dhe orientime për parandalimin e kultivimit të bimëve narkotike. Gjatë këtyre takimeve, ai përfaqësues i komunitetit ka ngritur këtë shqetësim se territori është i pamundur për tu kontrolluar, shkelur dhe verifikuar nga ana ime, kjo për shkak të terrenit të thyer.
Gjatë gjithë kësaj kohe, ai është munduar të kontrollojë territorin që mbuloi për të verifikuar nëse ka raste të kultivimit të lëndëve narkotike dhe nuk ka konstatuar raste të tilla. Ai theksoi se këto kontrolle ai i ka kryer dhe me shërbimet e policisë me të cilat nuk kanë konstatuar raste të mbjelljes së lëndëve narkotike. Thekson se në lidhje me rastin, nuk është i qartë për vendin dhe zonën ku janë gjendur për shkak se nuk ka qenë në vendngjarje së bashku me policinë për këtë rast. Nëse ai gjatë punës së tij do të kishte konstatuar bimë narkotike, do të kishte njoftuar shërbimet e policisë por nuk ka pasur dijeni për këtë fakt. Në çdo takim që ka pasur me banorët e zonës, jua ka bërë të qartë që të mos merren me veprimtari të paligjshme si ajo e kultivimit të lëndëve narkotike dhe nuk mban përgjegjësi për veprimet që mund të kenë kryer banorët e zonës ku është kryeplak pasi nuk ka qenë në dijeni për këtë rast.
Ai është i punësuar në një punë si roje me turne 8 orarëshe dhe 16 orarëshe. Sqaron se nuk ka dijeni për rastin e kultivimit se nëse do të kishte pasur, do të njoftonte dhe për këtë është i pafajshëm”, sqaroi kryeplaku në dëshminë e tij para policisë, të siguruar nga gazetarja e Top Channel Anila Hoxha.
Kryeplakut dhe 37-vjeçarit iu sekuestruan telefonat në cilësinë e provës materiale. Azem Dedej dyshohet se ka kryer komunikime telefonike me Rexhep Halilin, i cili kishte mbjellë 25 rrënjë lëndë narkotike.
