Policia vijon procedimet penale apo arrestimet ndaj personave që dyshohet se kanë shkaktuar zjarre në zona të ndryshme të vendit.
Kështu pas arrestimeve në Gjirokastër dhe Lezhë, raportohet se nga policia janë arrestuar 2 persona në Korçë dhe dy të tjerë në Berat janë proceduar penalisht për zjarrvënie të qëllimshme.
Dy personat e arrestuar në Korçë dyshohet se shkaktua zjarret në një sipërfaqe pyjore në fshatin Gjonomadh.
Përkatësisht është ndaluar 18-vjeçari A.Xh., dhe 22-vjeçari T.B., pasi dyshohet se tek zona e quajtur “Korija e fshatit” në Gjonomadh, këta shtetas, kanë djegur me zjarr një sipërfaqe pyjore me bimësi të ndryshme.
Ndërkohë materialet në ngarkim të tyre i kaluan Prokurorisë së Rrethit Gjyqësor Korçë për veprën penale “Shkatërrimi me zjarr i pyjeve dhe i mjedisit pyjor”.
Dy persona janë proceduar penalisht në Berat për zjarrvënie. Bëhet e ditur se shërbimet e Komisariatit Policisë Berat kanë proceduar penalisht B.Sh, banues në Berat, i cili dyshohet se ka shkaktuar zjarr nga pakujdesia në lagjen “Donika Kastrioti”, dhe si pasojë e përhapjes së flakëve është djegur një sipërfaqe toke me bar.
Gjithashtu, u procedua penalisht 28-vjeçari A.K, banues në Berat, pasi në vendin e quajtur mali Partizan, ka shkaktuar zjarr nga pakujdesia duke hedhur një cigare të ndezur në tokë dhe si pasojë është djegur një sipërfaqe toke me bimësi të ndryshme.
