Nga BoldNews.al
Një nga kompanitë farmaceutike të preferuara në tendera është shpallur fituese e një tenderi të majm nga Spitali Rajonal i Beratit. Një procedurë që ka zgjatur plot 8 muaj, me modifikime dokumentesh, kërkesa dhe ankesa. Madje, në lojë është futur edhe KPP, me disa pezullime dhe ç’pezullime procedure.
Por, në fund, është shpallur fituese kompania “Farma Net Albania”, e cila ka fituar në mënyrë të dyshimtë dhjetëra tendera shëndetësie, por që deri më tani duket se janë jashtë vëmendjes së organeve ligjzbatuese.
Në tenderin konkret janë bërë plot 5 modifikime, që në një garë normale nuk ka pse të ndodhin. Natyrisht, koha e ka treguar se ndryshimet bëhen për të favorizuar fituesin dhe për të futur në dosje dokumente që i përshtaten fituesit.
Sipas dokumenteve që disponon BoldNews.al, Spitali Rajonal i Beratit, ka shpallur fituese kompaninë “Farma Net Albania”, në tenderin e blerjeve të pajisjeve mjekësore. Në datën 27 janar 2021, Spitali i Beratit hapi tenderin me objekt “pajisje hotelerie dhe mjekësore për Maternitetin e Beratit”.
Loti 1 kishte si objekt blerjen e pajisjeve mjekësore, ndërsa fondi për këtë lot ka qenë rreth 500 mijë euro me TVSH. Në dokumente shkruhei se BOE “Farma Net Albania” dhe “FEDOS” dhanë një ofertë me vlerë 338 milionë lekë të vjetra, kurse “Biometric Albania” një vlerë 418 milionë lekë. Por, nga hulumtimi i dokumenteve rezulton se procedurë e dyshimtë nuk është oferta e kompanive, por loja e dyfishtë e anëtarëve të komisionit të vlerësimit të ofertave.
Sipas dokumenteve, për këtë procedurë ka pasur ankesë nga kompania “BIOMETRIC ALBANIA”. Ka pasur dyshime të mëdha që fituesi nuk i përmbushte kërkesat e këtij tenderi.
Në datën 3 shkurt 2021, është vendosur pezullimi i procedurës. Më pas është shqyrtuar ankesa nga komisioni i ngritur dhe është mbajtur proces verbali. Procedurat kanë vijuar në shkurt 2021, ku është paraqitur ankesë në KPP. Dhe në këtë moment është ngarkuar SPE shtojca e modifikuar në datën 16 shkurt 2021. Në datën 19 shkurt, KPP ka vendosur pezullimin e procedurës, ndërsa në mars jepet një vendim për vijimin e procedurës dhe ngarkohet një tjetër shtojcë në dokumente.
“AK ngarkon shtojcën e modifikuar më datë 30 mars 2021 dhe ka lajmëruar kompanitë se kjo procedurë do të qendrojë pezull. KPP, në prill 2021, heq pezullumin dhe ngarkohet një tjetër shtojcë në dokumente. Bëhet një tjetër ankesë dhe një tjetër pezullim në maj 2021. Sërish KPP merr një vendim për pezullim dhe e shqyrton në themel këtë çështje. Ndërkohë, vetëm në gusht merret vendimi për të vijuar procedurën pas plot disa pezullimeve dhe 5 shtojcave.
Sipas një hulimtimit të BoldNews.al, Spitali Rajonal i Beratit ka ndryshuar 5 herë dokumentet e këtij tenderi. Fillimisht për modifikim afatesh, ndërsa e dyta ka qenë për të modifikuar pajisjet mjekësore të lotit 1. E treta ka qenë në maj 2021, me justifikimin e vendimit të KPP-së. Më pas dy shtojca të tjera për të modifikuar dokumentet. Një procedurë e tejzgjatur, e cila natyrisht ka një fitues “Farma Net Albania” dhe të humbur qytetarët e Beratit që një shërbim bazë iu zvarrit për muaj me radhë.