Disa persona janë proceduar penalisht dhe arrestuar nga Policia e Lezhës dhe Mirditës, me dyshimin se kanë shkaktuar zjarret.
Policia e Lezhës arrestoi 52-vjeçarin Petrit Leka nga Zejmeni i Lezhës, pasi zjarri me të cilin dogji mbeturinat pranë shtëpisë, çoi në djegien e një sipërfaqeje të madhe me barishte dhe kullota. Shërbimet e Policisë, në bashkëpunim me zjarrfikësen, kanë bërë të mundur shuarjen e flakëve, duke parandaluar përhapjen e zjarrit i cili rrezikonte disa banesa dhe lokale, si dhe automjetet, pasi ishte anës rrugës kryesore në aksin Lezhë-Milot.
Gjithashtu është proceduar penalisht 70-vjeçarja Gjyste Vata nga Balldreni, e cila, pasi ndezi zjarr në kanalin kullues, s’e ndali dot më dhe dogji një sipërfaqe me bimësi në fshatin Balldre, Lezhë.
Policia e Lezhës tha se janë të angazhuara maksimalisht për të parandaluar, evidentuar dhe goditur rastet e zjarrvënies.
Policia e Mirditës ka arrestuar 66-vjeçarin Preng Luçia nga fshati Gjakëz, pasi zjarri që ndezi në oborrin e tij doli jashtë kontrollit dhe dogji një sipërfaqe të madhe me pyje dhe disa banesa të braktisura në fshatin Gjakëz të Mirditës.