Ministri i Mbrojtjes, Niko Peleshi, duket se ka shfrytëzuar situatën e zjarreve në Vlorë për të sulmuar kryebashkiakun e Rilindjes, Dritan Leli, i cili është shpallur tashmë një armik në rradhët e socialistëve nga Kryeministri Edi Rama.
Në një prononcim për mediat nga Vlora, Peleshi theksoi se shuarja e zjarreve ishte një detyrë e pushtetit vendor dhe jo të ministrisë së Mbrojtjes. Sipas tij, Ministria e Mbrojtjes vjen në ndihmë kur pushtetit vendor i shterojnë forcat.
Në fakt reagimi i Peleshit ndaj Lelit duket më shumë si një nxjerrje dufi ose tërheqje vëmendjeje, pasi Ministrisë së Mbrojtjes dhe FA-të, me gjithë show dhe propagandën, si dhe ndihmën e helikopterëve të ardhur nga dy vende të BE , iu desh të paktën 10 ditë të shuanin zjarret.
“Meqë jemi te pushteti vendor tani këtë zonë siç e shihni të pastër ne ia kthejmë mbrapsht në administrim siç e kanë dhe me ligj pushtetit vendor në rastin konkret të bashkisë së Vlorës.
E ftoj bashkinë e Vlorës të ngrihet në lartësinë e detyrës dhe të përgjegjësisë ligjore të marrë administrimin, vëzhgimin, kontrollin, vigjilencën le të rrinë këtu ditë e natë sepse MM dhe FA kanë detyra të tjera.
Ne jemi në mbështetje duke qenë se na shikojnë çdo ditë në TV dhe në frontin e parë të punës, meqenëse forcat tona janë më të mëdha dhe mjetet tona janë më të shumta krijohet perceptimi që kjo është një detyrë parësore e jona, në fakt dua të bëj dhe një sqarim për opinionin publik ne jemi në mbështetje pasi pushteti vendor ka shteruar të gjitha burimet e veta, çka do të thotë ligji ngarkon me përgjegjësi administrimi edhe menaxhimi i EC bashkitë e vendit tonë, të cilët detyrohen me ligj të kenë 4% të buxhetit të tyre të alokuar për Emergjencat Civile.
Pasi të përdorin mjetet e tyre zjarrfikëse dhe buxhetin e tyre atëherë thërrasin në ndihmë, kur del flaka në majën e malit apo në mes të parkut natyrisht ne nuk fshihemi mbrapa këtyre burokracive por do të ishte mirë gjithsecili në kohën e duhur të bëjë detyrën e tij në mënyrë që flaka mos shkojë deri në majë dhe i biem shkurt të marrim në telefon helikopterin.
E përsëris nuk kemi një numër të pafund helikopterësh, kemi dhe ne problemet tona na shërben dhe ne kjo situatë për të reflekuar për të qenë më mirë më të përgatitur vitin tjetër, nuk jemi perfektë. Duhet ta dini edhe me ligj ne jemi hallka e fundit e ndërhyrjes do t’u lutesha gjithë hallkave të tjera para se te vinin tek ne të bëjnë detyrën e tyre”, u shpreh Peleshi.
Nuk dihet nëse ministri i Mbrojtjes me të njëjtin ton do t´i flasë edhe Kryebashkiakut të Kukësit, Safet Gjici, i cili nga raportimet mësohet se ka kërkuar ndihmën e Ambasadorit shqiptar në Prishtinë, për të mundësuar ardhjen e trupave nga Kosova, ndonëse më pas vetë Gjici u tregua mosmirënjohës, duke thënë se zjarret i kishin fikur para se të vinim forcat nga Kosova.