“Lindi si një projekt i paqartë dhe vijon të jetë i tillë”. Është ky përkufizimi që eksperti i ekonomisë Zef Preçi, i bën projektit të Minshengenit, që së fundmi është pagëzuar me emrin ‘Ballkani i Hapur’.
Në një prononcim për Syri Tv, Preçi u shpreh se ky projekt i shërbeu liderëve të Ballkanit Perëndimor për të hequr vëmendjen nga situata në vendet e tyre.
Ndërkohë që sipas ekspertit të ekonomisë, Shqipëria dhe Kosova kanë nënshkruar 84 marrëveshje dhe pothuaj asnjë prej tyre nuk është implementuar.
“Mendoj se në termin që përdoret dhe në interesat që qëndrojnë në këtë përpjekje, mpleksen disa probleme të natyrës politike, administrative, të politikës së jashtme dhe në thelb e shikoj larg prodhimit të ndonjë rezultati të prekshëm për vendet e rajonit dhe më pak për Shqipërinë që hyn te vendet e varfra.
Mendoj se duhet te sqarojmë se si kemi ardhur te kjo ditë, që disa vende ende marrin pjesë dhe disa jo, dhe çfarë pasoja mund të ketë dhe a mund të ketë sukses apo jo.
Kjo nismë e filluar në kuadrin e procesit të Berlinit; dhe dihet që procesi i Berlinit ka qenë në thelb një përpjekje e vendeve kryesore të BE për të mbajtur të hapur derën e integrimit.
Që vende të Ballkanit Perëndimor si vende problematike qoftë në marrëdhëniet midis tyre, qoftë me vendet e BE, apo me fuqitë botërore si Kina, Rusia, Turqia apo vende arabe, ka qenë të tilla prej tri dekadash dhe aktualisht procesi i integrimit mbetet një çelës shumë i rëndësishëm që këto vende të prosperojnë, të dekurajohet braktisja e tyre, dhe të mos jenë vetëm pjesë natyrale e Evropës por edhe pjesë ekonomike e saj.
Kështu që procesi i Berlinit si një përpjekje për të mbajtur hapur derën e integrimit hodhi në tavolinë idenë e zonë ekonomike rajonale.
Që u përmend edhe në samitin e Triestes në vitin 2017, ku u artikulua publikisht nga lideri i Serbisë dhe zoti Rama dhe në këtë mënyrë mori jetë një përpjekje që nuk kishte qartësi, por që edhe sot nuk është e qartë.
Pasi vendet e rajonit përveçse kanë diferenca të theksuara në nivelin e zhvillimit ekonomik dhe shoqëror, përveçse kanë probleme politike, Serbia nuk ka njohur akoma Kosovën, përveçse se janë në stade të ndryshme në procesin e integrimit në BE, u hodh kjo tezë që më shumë shërbeu që liderët e interesuar, Serbia të demonstronte një vullnet të mirë përballë autoritetit të Brukselit që të mund të përfitonte në procesin e integrimit, Maqedonia apo Shqipëria në kuadrin e paaftësisë me problemet e brendshme që lidhen me zgjedhjet, me korrupsionin, me krimin e organizuar, edhe Shqipëria përdori këtë kartë për ti hedhur hi syve Perëndimit që ne po ecim në rrugën e duhur.
Nëse shikojmë marrëveshjet e firmosura midis Kosovës dhe Shqipërisë, janë 84 marrëveshje dhe asnjë prej tyre nuk është zbatuar”, theksoi Preçi.
