Nasser Al Khelaifi, numri 1 i PSG, nuk e fshehu gëzimin për ardhjen e Leo Messit në ekipin e tij, duke e cilësuar si kulmin e një projekti të nisur vite më parë.
“Jam shumë i lumtur, shumë krenar që prezantoj sot Leo Messin si lojtar të PSG -së. Është një ditë historike, e pabesueshme për këtë klub dhe gjithë botën e futbollit. Shpresoj që Parisi të bëhet qyteti i tij preferuar dhe mendoj se është vetëm fillimi pasi tani vjen puna e madhe në fushë, ajo që ka vërtet rëndësi.
Leo ka fituar shumë trofe dhe do të vazhdojë të fitojë me shokët e tij të rinj të skuadrës. Ne kemi disa nga futbollistët më të fortë në botë dhe një nga trajnerët më të mirë në botë.
Të gjithë e njohin Leo, ai është unik, i vetmi që ka fituar Topin e Artë gjashtë herë, ai i ka dhënë magjinë e tij futbollit dhe do të jetë e mrekullueshme për të gjithë tifozët e PSG por edhe atë që ne menaxhuam të bëjmë me Leonardon dhe të gjithë klubin është e pabesueshme.
Mbaj mend ditën e parë të Leonardos këtu dhjetë vjet më parë, njerëzit po pyesnin se çfarë do të bëhej me këtë klub. Ne kishim ambicie të mëdha dhe sot po e bëjmë këtë me krenari të madhe”, tha Khelaifi.
