Më shumë se 99.99% e njerëzve që janë plotësisht të vaksinuar kundër Covid-19 nuk kanë pasur probleme me virusin, që rezulton në shtrimin në spital ose vdekje, sipas një analize të CNN referuar të dhënave zyrtare në SHBA.
Deri më 2 gusht, më shumë se 164 milion njerëz në Shtetet e Bashkuara u vaksinuan plotësisht kundër Covid-19, sipas CDC. Më pak se 0.001% e atyre individëve, 1.507 persona, vdiqën dhe më pak se 0.005%, 7.101 persona, u shtruan në spital me Covid-19.
Rreth tre të katërtat (74%) e të gjitha rasteve të përparuara të raportuara ishin midis të moshuarve të moshës 65 vjeç e lart. Nga afro 1,500 njerëz që vdiqën, një në pesë vdiq nga diçka tjetër përveç Covid-19.
Referuar kësaj analize të CNN duket se vaksinimi është arma më e mirë kundër Covid.
Por cila është situata në Shqipëri?
Referuar shifrave zyrtare në Shqipëri janë 1,082 pacientë aktivë me COVID-19 në të gjithë vendin. Në Spitalin Infektiv po marrin trajtim spitalor të specializuar 30 pacientë.
Të hënën në vendin tonë mbërriten edhe 45,630 doza të vaksinës Pfizer, duke e çuar në mbi 1,8 milion numrin e vaksinave të mbërritura në Shqipëri.
Referuar të dhënave zyrtare të ministrisë së shëndetësisë, aktualisht numri i të vaksinuarve ka shkuar në 1,270,057 persona.
Por vaksina më e përdorshme është ajo Sinovac, e cila ka marrë një miratim nga OBSH, por nuk njihet nga EMA. Nuk dihet se sa është mbrojtja që kjo vaksinë mbron, pavarësisht entuziazmit të autoriteteve shëndetësore në Shqipëri apo në shtetet ku ajo përdoret.
