Gerard Pique ka thënë se Barcelona është “pak e thyer”, pavarësisht se ka fituar 3-0 ndaj Juventusit për “Trofeun Joan Gamper”. Ishte një mbrëmje emocionuese në “Camp Nou”, me një konferencë shtypi që u mbajt më herët gjatë ditës, në të cilën Lionel Messi i dha lamtumirën e përlotur klubit.
Pique pranoi se shpresat nuk janë të mëdha për sezonin e ardhshëm, për shkak të humbjes së një prej lojtarëve më të mëdhenj të futbollit. “Ekipi ishte sinqerisht i prekur për shkak të largimit të Messit. Ne do të humbasim magjinë në sulm, por duhet të ecim përpara. Tifozët presin shumë nga ne.
Ne po humbasim lojtarin më të mirë të të gjitha kohërave. Na ka lënduar shumë kjo ndarje, sikurse e ka lënduar edhe atë. Nuk e di të gjithë historinë, të dyja palët kanë thënë se ka qenë çështje shifrash në mes… Menaxhimi i viteve të fundit nuk ka ndihmuar, por historia tregon se do të ngrihemi.
Njerëzit me të vërtetë duan të vijnë në stadium dhe ne duhet t’i gëzojmë tifozët. Duhet të fillojmë të fitojmë dhe t’u japim atyre gjëra të mira. Ne kemi nevojë për tifozët”.
Në fushë, ndërkohë, Barcelona u përgjigj pozitivisht kundër një ekipi si Juventusi që përmbante yje të tillë si Cristiano Ronaldo, Alvaro Morata dhe Matthijs de Ligt. Sidoqoftë, testi i vërtetë për Barçën do të vijë kur të fillojë La Liga javën e ardhshme me një përballje në shtëpi kundër Real Sociedad.
