Një sipërfaqe prej disa hektarësh pylli me pisha vijon të digjet në Gjorgjoz të Fierit. Sipas raportimeve të Syri TV, një vatër e re zjarri është aktivizuar në zonë, ndërsa mësohet se policia ka arrestuar dy persona për zjarrvënie të qëllimshme. Nga hetimet rezulton se këta shtetas janë autorë edhe të zjarrvënies në pyllin e fshatit Kreshpan.
“Në vijim të hetimeve, pas informacioneve dhe provave të grumbulluara, nga specialistët e Komisariatit të Fierit, u arrestuan në flagrancë shtetasit Arben Muskaj dhe Zarif Muskaj për shkatërrim të pronës me zjarr e kryer në bashkëpunim”, njoftoi policia.
Për shuarjen e flakëve këtë të dielë është kërkuar ose ndërhyrja e helikopterit ose e forcave të ushtrisë. Shërbimi zjarrëfikës i Fierit vazhdon të jetë në terren duke punuar për neutralizimin e flakëve.
Zjarri ka nisur që prej mëngjesit të së shtunës dhe i ndihmuar nga era është përhapur. Terreni i thyer dhe era kanë vështirësuar fikjen.
Gjatë kesaj periudhe vere zona e Gjorgozit është përfshirë disa herë nga zjarrri duke djegur shumë ha pyje dhe ullishte.
Nga ana tjetër, Policia e Fierit është angazhuar për identifikimin dhe arrestimin e autorëve të zjarrvënieve.
