Talibanët kanë marrë nën kontroll qytetin e Sherberganit në provincën veriore të Xhauzjanit nw Afganistan një lajm që është pritur me shqetësim në arenën ndërkombëtare.
Ky është kryeqyteti i dytë rajonal që bie në dorë të militantëve brenda dy ditëve. Kujtojmë që një ditë më parë, edhe Nimrozi u vu nën kontroll nga organizata fondamentaliste.
Diçka e tillë është analizuar si një humbje e madhe për forcat e sigurisë të cilat po përballen me vështirësi të mëdha që prej largimit të trupave amerikane.
Situata paraqitet e rrezikshme edhe në provincën veriore të Kunduzit si dhe në Lashkar Gah në jug.
Mediet kanë raportuar për përplasje të ashpra të armatosura.
Pas marrjes nën kontroll të qyteteve, tashmë talibanët do të synojnë që të vënë nën diktatin e tyre pikat strategjike.
Këtu përfshihen aeroportet civile dhe ushtarake si dhe bazat e municioneve.
Gazetarët e terrenit njoftojnë se shumica e forcave të armatosura janë tërhequr për mbrojtjen e tyre, por rezistenca duket mjaft e vështirë. Afghanistani është kthyer tashmë në një vend të paqëndrueshëm.
Qeveritë e ShBA-së dhe Mbretërisë së Bashkuar kanë udhëzuar qytetarët e tyre që të largohen menjëherë nga ky shtet pasi situata pritet të shkojë vetëm drejt përkeqësimit.
