Ish-Kryeministri Sali Berisha përmes një postimi në rrjetet sociale ka njoftuar mbajtjen e një konference për mediat në orën 12:00.
Konferenca e ish-Kryeministrit do të mbahet në hotel Rogner, atje ku rreth 3 muaj më parë, reagoi lidhur me shpalljen non grata nga Departamenti i Shtetit.
Me shumë gjasa Berisha do të sqarojë edhe njëherë qëndrimin e tij lidhur me Parlamentin e ri, ku ai bazuar në listën e kandidatëve për deputet të PD-së ka fituar mandatin. Në deklarimet e deritanishme Berisha është shprehur i prerë se do të jetë në Parlament, madje mezi e pret nisjen e punimeve të sesionit të ri parlamentar.
Gjithashtu Berisha ka mohuar deri më tani çdo mundësi se mund të tërhiqet, pavarësisht apeleve dhe thirrjeve të ambasadores së SHBA, Yuri Kim, që ka kërkuar publikisht nga kreu demokrat Lulzim Basha të rishohë listën e kandidatëve.
Nuk dihet nëse Berisha do të mund të ndryshojë mendim ose jo, ndërkohë që nga kreu demokrat Lulzim Basha nuk ka pasur asnjë koment lidhur me deklaratat e ambasadores Kim, e cila nuk nguroi që nga shkallët e godinës së PD-së, të përdorë një shprehje të kohës së komunizmit “do hamë edhe bar…”, duke paralajmëruar të tjera zhvillime, nëse nuk do të kishte një vendim nga PD dhe Basha.
Berisha ka deklaruar se vendimi për shpalljen non grata të tij nga DASH është lobuar nga Soros dhe Edi Rama, duke theksuar se ndaj tij nuk ka asnjë provë apo fakt. Ai ka kërkuar publikimin e fakteve dhe provave, ndërsa 3 muaj më parë njoftoi se do të ndiqte rrugën ligjore në një nga Gjykatat e Parisit.
