Tirana është Bashkia me numrin më të lartë të rasteve pozitive me Covid-19, duke numëruar rreth 170 raste, të paktën sipas shifrave zyrtare të Ministrisë së Shëndetësisë të raportuara ditën e martë.
Ndërkohë që po në Tiranë realizohet edhe numri më i lartë i testimeve, tre zonat që konsiderohen me përhapjen më të madhe të pacientëve aktivë me Covid-19 janë Kamza, Lapraka dhe Astiri.
Shumë prej pacientëve të prekur rezultojnë se janë vaksinuar me të dy dozat, ndërsa nuk dihet se çfarë vaksinash ato kanë marrë. Burime zyrtare bëjnë me dije se gjendja e tyre është e stabilizuar, pa komplikacione dhe nuk përfshihen te rastet e rënda.
Gjithashtu të rinjtë përbëjnë numrin më të lartë të të prekurve. Ato po shfaqin shenja të ngjashme me virozat. Ndërkohë nuk mungojnë as personat asimptomatik që po përhapin infeksionin pa e kuptuar.
“Persona që rezultojnë pozitivë, kryesisht kanë shenja të një viroze. Por ka edhe persona që nuk paraqesin fare shenja. Ato rezultojnë pozitivë sepse kanë qenë në kontakt me persona të ardhur nga jashtë ose persona që rezultojnë të prekur në familjet e tyre”, thotë epidemiologia Ermelinda Murati.
Përgjatë muajit gusht procesi i vaksinimit është i lirë, ku çdo qytetar mbi 18 vjeç mund të shkojë dhe të vaksinohet me një nga vaksinat që qarkullon në Shqipëri, ku më e përdorshmja është kinezja Sinovac dhe më pas AstraZeneca.
