Në mesazhin e tij të Krishtlindjes Papa Françesku ju drejtua mijëra pelegrinëve katolikë të mbledhur në sheshin e Shën Pjetrit ka bërë thirrje që lufta në Siri të përfundojë, pasi shumë gjak është derdhur në këtë konflikt.
Nën masa të larta sigurie, nisur edhe nga sulmi me kamion në Berlin vetëm javën e kaluar, në bekimin e tij, i njohur si Urbi et Orbi, Papa kujtoi dhe nderoi edhe të 12 viktimat. Në fjalën e tij, nuk mungoi as thirrja që izraelitët e palestinezët të lënë pas urrejtjen dhe hakmarrjen, dhe të bashkohen për të shkruar një faqe të re në histori.
“Paqe për ata që kanë humbur një person të dashur për shkak të akteve brutale të terrorizmit, që kanë mbjellë frikë dhe vdekje në zemrat e shumë vendeve dhe qyteteve. Është koha që armët të pushojnë në Siri dhe komuniteti ndërkombëtar të kërkojnë një zgjidhje, që bashkekzistenca civile të rikthehet në vend. Paqe për njerëzit që vuajnë nga ambiciet ekonomike të pakicës, për shkak të zilisë dhe adhurimit për paratë, që çon në skllavëri.”
Papa Françesku zgjodhi që në këto Krishtlindje të përcillte disa mesazhe të forta mbi paqen. Vetëm një natë më parë, në meshën e Krishtlindjeve, Papa u shpreh se kuptimi i vërtetë i Krishtlindjeve ishte zbehur për shkak të materializmit dhe indiferencës.
